Çimdarê sîyasîyî Felah Selahî derheqê rewşa Başûrê Kurdîstanî, weçînayîşê serekkomarîye yê Iraqî û hêrişanê dewleta tirke de ANFyî rê qisey kerd. 

Selahî vist vîrî ke 6 mengî yo hema zî hukmatê Iraqî nêronîyayo û vat: ''Hema zî seba ronîyayîşê hukmatê neweyî îradeyêk nêame mojnayene. Na rewşe kena ke alozîya mabênê kurd, şîî, sunî û tirkmenan giranêr biba. Heyf ke seba ke mabênê kurdan de nakokîye est a, hukmat ronênîyeno. Çunke terefê kurdî seba serekkomarîye meseleyanê xo çareser nêkenê. Heyf ke yewîya çar parçeyanê Kurdîstanî bîya hewnêk. Hêzanê sîyasîyan Başûr de hêvîya yewîye kerda binê erdî. Netîceya weçînayîşê Iraq û Başûrî mojnena ke nê hêzê sîyasîyî nêeşkenê îradeyê şarî temsîl bikerê.

Başûrê Kurdîstanî hedefê hêzanê hegemonîkan de yo. Îran û Tirkîya erdê Başûrî danê bombayan ver, Amerîka zî Bexdad de şîîyan kişena. Eke hêzê sîyasî yê Kurdîstanî bi hişyarî têmêgêrê û pîya mebê statuyê Başûrî do destî ra şoro.''

Selahî bale ante sewqîyato leşkerî yê ver bi waranê gerîlayan ser û vat: ''Ma bi zelalî nêzanenê ke çita ha qewimîyena la aseno ke mabênê hêzanê Kurdîstanî de dişmenîye virazîyena. Nika wext wextê çareserkerdişê meseleyan o. Seba ke hêzê Kurdîstanî yê çar parçeyanê Kurdîstanî, seba aramî û yewîye gamêke bierzê nê wextî ra holêr wextêk çin o. Birakûjî do zerar bida pêro kurdan û her parçeyê Kurdîstanî. Nika xora Başûr de krîzê sîyasî, ekonomîl û perwerdeyî zaf ê. Eke hêzê Başûrî bi aqlê xo têmêgêrê krîzê hîna pîlêrî do biqewimîyê.''