5ê teşrîna verêne ya 2021î de PDKyî bi damêke 5 gerîlayî şehîd kerdbî û dest nabî  cenazayanê înan ser.  Meclîsê Keyeyanê Şehîdan ê Herêma Cizîre semedo ke cenazayan bigêro verê Berê Sînorî yê Sêmalka de çalakîya xeyme dabî destpêkerdene. Roja 9. ya çalakîye de bi hezaran kesê ke sînorê Rojawan-Başûrê Kurdîstanî de ameyî têhet PDK şermezar kerd û veng da ci ke wa hemkarîya Tirkîya caverdo.

Çalakîye de bi nameyê Hêzanê Pawitişî yê Komelkî  (HPC)  Dayîka Hogir qisey kerd û tewirê keyeyê Barzanî û hukmarê Herêma Kurdîstanî şermezar kerd.

Dayîka Hogir bi wesîleya serrgêra Kompoloyê Mîyanneteweyî yê 9ê Teşrîna Verêne ya ke vera Rayberê Şarê Kurdî Abdullah Ocalanî ame kerdene komplo şermezar kerd û vat: ''Ma soz danê Rayberîya xo û heme dinya ke ma do têkoşînî rê dewam bikerê. Eke vera Rayberîya ma çîyêk bêro kerdene ma do dinya birijnê. Kam ke zerrîya ma vêşneno ma do zerrîya înan zî wîna bivêşnê. Rayberîye têna semedê şarê kurdî nê semedê heme şaranê bindestan têkoşîn keno. Rayberîye îrade û eşqê ma yo. Ma heme talebê û mîlîtanê ey yê, coka çew nêeşkeno îradeyê ma bişikino.''

Dayîka Hogir  wina dewam kerd: ''Bitaybetî keyeyê Barzanî hukmatê Başûrê Kurdîstanî kewto xeta xîyanetî. Ma vera fîkranê înan nîyê. Vera xîyanetî yê. Ê kewtê rayîrê xeletî yê xeta dişmenî. Ma vera nayî yê. Xeta dişmenî ra vejîyê. Bêrê xeta têkoşînî.  Xeta PKKyî xeta xoverdayîşî ya. Şima tim xeta xîyanetî de yê. Eke şima wina dewam bikerê do tarîx û kurdî şima lanet bikerê. Mekerê na xeletîye ra agêrê. Wa şarê ma yê Başûrê Kurdîstanî bizano ke ma vera şima nê vera hukmatê şima yê.

Înanê ke tîya ra bar kerd pê fonanê dewleta tirke kerdî leşker û şawenê serê  kurdan. Şima vanê ma wayûbirayî yê, wayûbiratîya şima ha ça? Şima vanê ma kurd ê, kurdîtîya şima ha ça? Wa şarê Başûrê Kurdîstanî vera hukmatî aye bo. Wayûbirayan yewbînan rê danê kiştene. Dewleta tirke û hêzê mîyanneteweyî 40 serrî yo nêeşkenê vera PKKyî vinderê. Nêeşkayî îradeyê PKKyî bişiknê. Çunke îradeyê ma îradeyê xoverdyayîş o.  Keyeyê Barzanî û hukmatê Başûrê Kurdîstanî xeta xîyanetî de yê.''