Serekê Partîya Azadîye û Demokrasî ya Êzidîyan (PADÊ) Omer Salih Îbrahîmî derheqê peymana mabênê Hewlêr û Bexdadî ya seba Şingalî de ANFyî rê qisey kerd.

Qiseykerdişê Îbrahîmî ra beşêk wina yo:

''Na peymane bêîradeyê şarê Şingalî ameye kerdene coka qet nêna qebulkerdene. Xelisnayîşê Şingalî de yew barê Iraq yan zî Hukmatê Başûrî çin o. Xebera şarê ma zî na peymane ra çin a. Se ra 80ê şarê Şingalî do na peymane qet qebul nêkero. Ma zî sey PADÊ na peymane qet qebul nêkenê.

Pêro hêzê ke nika Şingal de yê, hêzê fermî yê Iraqî yê.  YBŞ-YJŞ, Haşdî Şabî û hêzê bînî pabesteyê Hukmatê Iraqî yê. Seba ke wextê DAÎŞî de PDKyî êzidîyî nêpawitî  şarê ma pê PDKyî bawer nêkeno.

Peyê na peymane de hêzê hegemonîkî yê sey Iraq, Amerîka, Tirkîya estê. PDK seba ke êzidîyî anêgêrê Şingalî peymanêka winasêne eşte werte. Bi na peymane PDK wazeno herême de meseleyê neweyî biqewimîyê.PDK verê şarê Şingalî gêno û înan rê vano wa anêgêrê. 

PDK nika nameyê ma ser o qisey keno la çira serra 2014î de destê DAÎŞî de û serra 2017î de zî destê Haşdî Şabî de ma teyna verdayî? Êzidîyî sey êzidîyanê serra 2014î nîyê. Ma do qet yew peymana ke ma tesdîq nêkerda, qebul nêkerê.''