Serra 2019î de Kurdîstan de zaf serebûtî ameyî meydan. Her parçeyê Kurdîstanî de babetê vejîyayî verî. Vakur, Rojawan û Başûrê Kurdîstanî de zî polîtîkayê şerî yê îtîfaqê faşîstî yê AKP-MHPyî û hêrişê vera xoverdayîşê kurdan ameyî meydan. Vakur de grevê vêşanîye, Rojawan de hêrişê vera sivîlan, Başûr de zî têkoşînê şarî yê vera îqtîdarî û Rojhelat de zî nawnayîşê girseyî morê xo da serra 2019î ro. La bi hawayêkê hemparî yewîya neteweyîye bîye babeta kurdan û kurdan serra 2019î de bi têkoşîn û xoverdayîşî derbaz kerd.

Endamê Dîwanê Hemserekîya KCDyî û Parlamenterê HDPyî yê Amedî Musa Farisogullariyî serebûtê girîngî yê serra 2019î ercnayî.

Ercnayîşê Farisogullariyî wina yê: "Serra 2019î bi xoverdayîşê şarê Kurdîstanî derbaz bîye û ma bi ruhê serkewtişî kewtî serra 2020î. Serra 2019î de hêrişê giranî vera kurdan ameyî kerdene. Her parçeyê Kurdîstanî de bitaybetî Vakur û Rojawan de vera kurdan polîtîkayê şerî ame kerdene.

Grevê Vêşanîye

Vera tecrîdê Rayberê Şarê Kurdî Abdullah Ocalanî Hemsereka KCDyî Leyla Guven 8ê teşrîna peyêna 2018î de dest pê grevê vêşanîye kerd. 16ê kanûne de zî zîndanan de grev dest pêkerd. 1ê adare de zî no grev pêro zîndanan de vila bi. Dima 30 tepişteyan dest pê rojeyê mergî kerd. Hewlêr, Strasburg, Galler, Mexmûr û Toronto de zaf kesî tewrê na çalakîye bîye. 7 tepişteyan zî vera tecrîde çalakîye kerde û merdî. Nê çalakîyî armancê xo ard meydan û mesajê Rayber Ocalanî yê 22ê gulane ra dima grev û rojeyê mergî ameyî qedînayene. Coka no dewir seba têkoşînê ma zaf girîng bi. Dima çed reyî avûkatan Ocalan reyde pêvînayîşî kerdî.

Sîstemê Cuya Alternatîfe

Tecrîd têna vera Ocalanî ney vera şarî zî yeno kerdene. Vakur de kesê ke polîtîkayê AKP-MHPyî rexne kerdî û vejîyayî meydanan rastê hêrişan ameyî. Dewlete seba menfaatanê xo Rojawan îşxal kerd. Eke merdim biewno nê îşxalî fam keno ke komployo mîyanneteweyî dewam keno. Hêzê serdestî kurdan kenê hedef. Wazenê ke sîstemê cuya alternatîfe çin bikê û Rojhelatê Mîyanênî newe ra dîzayn bikê.

Şarê kurdî wazeno Rojhelatê Mîyanênî de sîstemêkê neweyî awan biko. Hêrişê ke yenê kerdene vera ney yenê kerdene. NATO bi hawayêkê eşkera vera kurdan şer nêkena. La paştî dana hêrişênê dewleta tirke.Vera nê hêrişan xoverdayîşê kurdan bêhempa bi. Dinya de bi hezaran kesî vejîyayî meydanan û no xoverdayîşê neteweyî fîraz kerd.

Yewîya Neteweyîye

Serra 2019î de bi hawayêkê hemparî yewîya neteweyîye bîye babeta her parçeyê Kurdîstanî. Ma do serra 2020î de yewîya xo awan bikê û nê warî de gamê pîtî bierzê. Şarê kurdî sîyasetmedaranê xo ra netîce wazeno û ganî sîyasetê ma cewabê nê waştişê tarîxî bidê. Ma do yewîya xo awan bikê û pîya vera asîmîlasyonî têkoşînê xo xurt bikê.

Azadîya Ocalanî

Serra 2020î seba şarê ma do biba serra serkewtişî. Heta ke tecrîdê Ocalanî nêro şiknayene Rojhelatê Mîyanênî de û Tirkîya de aramîye nêna meydan. Heta ke Ocalan azad nêbo komelê ma do azad nêbo. Ma serra 2020î de do têkoşînê xo şarê xo reyde xurt bikê, tecrîd bişiknê. Ma şarê ereban, farsan û tirkan reyde cepheyêkê neweyî awan bikê û têkoşînê xo berz bikê. Caardiş3e înan wezîfeyê partîya ma û KCDyî yê verênî yê."