Roniştoxanê Kampa Multecîyan a Şehîd Rûstem Cûdîyî bi wesîleya serrgêra 2. abluqaya vera kampe pê çalakîya rayraşîyayîşî protesto kerd. Çalakîye de sloganê 'Biciwîyo Serek Apo', 'Bimiro îxanet' ameyî vatene û pankarta 'Têkoşînê ma yo hempar do îxanet çin bikero, Kurdîstan keyeyê Barzanîyan nîyo, warê pêro kurdan o' ameye akerdene.

Roniştoxan verê bînaya Neteweyanê Yewbîyayeyan de eşkerayîye daye. Eşkerayîye de ame vatene ke dewleta tirke wazena pêro kurdan qir bikera û tim hêrişê Mexmûr, Rojawan, Şingal û Başûrî kena. Eşkerayîye de ame vîrvistene ke dima ke berpirsanê MÎTî ra Osman Kose 17ê temmuza 2019î de Hewlêr de kişîya hukmatê Herêma Kurdîstanî vera Kampa Mexmûrî ambargo kerd. Eşkerayîye de ame parekerdene ke ambargoyî ra semed nêweşî, wendekarî û xebatkarî zî nêeşkenê Mexmûrî ra vejê û xeylêk meseleyî qewimîyenê. Eşkerayîye de venga pêro kurdan û dezgehan dîya ke vera ney bêveng nêmanê û ambargo bêro wedaritene.