Kesê ke Terteleyê Dêrsimî de ameybî kiştene serrgêra 82’ine ya terteleyî de Meydanê Seyîd Rizayî de ameyî vîrardene. Eşkerayîye de vajîya, “Roja 4’ê Gulane ya Terteleyê Dêrsimî yê 37-38’î de ke ma seba mehsûmanê pakan û heme cananê xo dua kenê, seba xatirê înan loqmeyan vila kenê û çira tafînenê ma anê vîrî ke ma mesuldaran nas kenê û ma soz danê ke do hesabê nê terteleyî bêro perskerdene.”

Eşkerayîya ke Meydanê Seyîd Rizayî de dîyaye ra dima gulbangî wanîyayî, çirayî ameyî tafînayene û loqmeyî ameyî parekerdene.

DAD, DEDEF, EMEP, ESP, HDP, ÎHD, PARTÎZAN, PSAKD DERSÎM, SMF, serekê şaredarîya Dêrsîmî Fatîh Mehmet Maçoglû û xeylî hemwelatijî tewrê ci bîyî.

Hemserekê DAD’î Mûsa Kûlûyo ke verê eşkerayîye qisey kerd vat, “Dewlete ma dir ne ziwan verda ne zî tarîx. Amacê înan no bi ke ma raste ra wedarê û bikerê sunî. Ewro xeylî cayan ra Dêrsimijî ameyî tîya û ramot ke înan xo nêkerdo xovîr ra û dewlete ra wazenê ke şarê Dêrsimî ra ozr biwazo.

Eşkerayîye hetê endamê Heyetê Rayberdişî yê DEDEF’î Zulfu Ûçarî ra amî wendene. Ûçarî vat, “Tradîsyonê qirkerdişî yo ke xo seperneno zihnîyetê Fîravûn û Nemrûdan ûca ra resayo Osmanîyan û îtîhatkaranê Komare û newe ra şekil dîyayo qirkerdişan. Serranê 1920’an ra dima bi desan raporî derheqê Dêrsimî de ameyî amadekerdene. Qanûnê neweyî ameyî viraştene. Seba operasyonanê leşkerîyan rayîrî û qereqolî ameyî viraştene. Dewlete seba ke şarê Dêrsimî qir bikero serra 1935 de “Qanûnê Tûnçelî” vet. 4’ê Gulane ya 1937’î de bi Qerarê Heyetê Wezîran înan dest bi qirkerdişê Dêrsimî kerd. Naye ra na roje sey “Roja Vîrardişê Terteleyê Dêrsimî’ yena qebûlkerdene.”

Ûçarî dewamê eşkerayîye de nê vatî: “Terteleyê Dêrsimî terteleyo tewr barbar ê merdimîye yo û bi qanûnê ke hetê dewlete ra ameyo vetene no tertele ameyo kerdene. No sûcêko hemverê merdimîye yo.”

“Qirkerdişê Dêrsimî Xovîr ra Meke”

Ûçarî peynîya eşkerayîye de vat, “Roja 4’ê Gulane ya Terteleyê Dêrsimî yê 37-38’î de ke ma seba mehsûmanê pakan û heme cananê xo dua kenê, seba xatirê înan loqmeyan vila kenê û çira tafînenê. Ma anê vîrî ke ma mesuldaran nas kenê û ma soz danê ke do hesabê nê terteleyî bêro perskerdene.

Waştişê ma nê yê:

 “Qirkerdişê Dêrsimî Xovîr ra meke!

- Wa polîtîkayê înkar û asîmîlasyonî yê serê şarê Dêrsimî bêrê caverdayene!

- Wa 4’ê Gulane sey roja Tereteleyê Dêrsimî 38 bêro qebûlkerdene!

- Wa arşîvî bêrê akerdene, dewlete qirkerdişî dir bêro têrî!

– Wa nameyê Dêrsimî bêro îadekerdene!

- Wa dewlete şarê Dêrsimî ra ozrê xo biwazo!

- Wa lîsteya sirgûnan, vînîbîyayeyan û domananê ke sey ewlad ameyê girewtene bêro eşkerakerdene û wa cayê mezelê Seyîd Rizayî û embazanê ci bêro eşkerakerdene!

- Wa ziwanê ma û bawerîya ma ya Qizilbaş Elewîye azad bêro veradayene!

- Wa projeye Awbendê Munzurî bêrê betalkerdene.”