Peymana Bexdad-Hewlêr-Anqara ra dima yewînê destpêkî yê leşkerî 24ê teşrîna peyêne de ameyî sewqkerdene. Sewqîyato leşkerî mîyanê 24 saetan de zêdîya. Hukmatê Iraqî îdîa kerdbi ke hêzo leşkerî yê Şingalî dı bêro vurnayene û sînorî ser o hêzî bêrê erşawitene.

Labelê hêzê ke verî erşawîyabî herême ra nêvejîyayî û yewînê polîsan ê neweyî û hêzê operasyonî yê Hukmatê Federalî yê Iraqî zêdîyayî. Sewqîyatê peyênî şewa 25ê teşrîna peyêne de saete 23:30 de dest pêkerd.

Goreyê zanayîşan wextê sewqîyatî de nêmeyê şewe Hêzanê Asayîşî yê YBŞyî rê ame vatene: '' Ma seba ke vera YBŞyî şer bikerê ameyî.''Şahîdan pare kerd ke mîyanê nê hêzan de kesê ke bi tirkî qisey kerdêne estbî.

Çimeyanê têgêrayîşo leşkerî yê Şingalî teqîb kenê, îfade kerd ke heta nika 8 hezar leşker û polîsê taybetî herême de ameyî cakerdene. Heman çimeyan eşkera kerd hêzo leşkerî do di qatî bêro zêdînayene.

Meclîsê Xoserîya Demokratîke ya Şingalî dabi zanayene ke armencê na peymane nê yê:

-Çinkerdişê îradeyê êzidîyan, çinkerdişê hêzanê xopawitişî yê êzidîyan, 

-Destsernayîşê çekanê şarê Şingalî

-Kontrolkerdişê rayîranê Şingalî

-Agêrayîşê tay erebanê ke paştî daye qirkerdişê êzidîyan.