Başûrê Kurdîstanî de rojnamegeranê cinîyan seba ke bale biancê şehadetê Gulîstane Tara û Hêro Bahadînî ser rayraşîyayîşo girseyî kerd. Badê rayraşîyayîşî Parka Azadî ya Silêmanî de bi eşkerayîya çapemenîye hêrişê dewleta tirke ameyî şermezarkerdene.

Bi nameyê cinîyan ê kedkaran ê çapemenîya azade metnê eşkerayîye hetê Teware Adil ra ame wendene. Eşkerayîye ra qismêk wina yo:

''Hukmat û dezgehê Iraq û Herêma Kurdîstanî rixmo ke hêrişê dewleta tirke de sîvîl û rojnamegerî ameyî qetilkerdene, hema zî bêveng ê. No hêriş netîceya hemkarîya pêkerdişê hêzanê ke Kurdîstanî îşxal kerda de qeqimîya. Bitaybetî netîceya pêkerdişê Tirkîya-Iraqî de bi  ke binê çimdarîya PDKyî de ame kerdene.  Her roje vera şarê kurdî polîtîkayê newe û leyminî yenê caardene. Şingalî ra heta Hemrînî polîtîkayê rijnayîş û îşxalî yenê rayraberdene. Kam ke vengê xo vejo sey xayînî yeno tepiştene. Ewro zilm û faşîzmê dewleta tirke bi hemkaran û xayînîye dahîna xurt bîyo.

Kurdê azadî çar parçeyanê Kurdîstanî de, dinya û  koyanê azadan ê Kurdîstanî de xover danê. Tîya wezîfeyê tewr muhîm ê rojanmegeran o.  Ganî îşxalkerî û planê înan bêrê eşkerakerdene. Ma do sey Viyan Caf, Nûjiyan Erhan, Deniz Fırat, Pexşan Ezîzî û Nagihan Akarsel rayîrê Gulistan Tara û Hêro Bahadîn ra rayra şirê û rayîrê azadîye, heqîqet û xoserîye de xo aver berê. Ma sey rojnamegeran ê cinîyan ê azadan ê Başûrê Kurdîstanî  nê hêrişî bişîdetî şermezar kenê. Ma şarê xo hîşyar kenê, eke Tirkîya bireso hedefê  xo, Başûrê Kurdîstanî de qet asayîşê çewî nêmaneno.

Ma veng danê sendîkayanê rojnamegeran, dezgehanê komelê sîvîlî, cinîyan, partîyanê sîyasîyan, îdarekaranê Herêma Kurdîstanî û Iraqî; vera hêrişan bêveng memanê, vengê xo platformanê mîyanneteweyî de bidê eşnawitene. Vera hêrişanê dewleta tirke bivejîyê. Çunke bêvengîye do sey lekeyê qerî tarîx de cayê xo bîgêro. Ma şarê xo rê nê vanî; nê hêrişî nêeşkenê ma rê peyser game bidê eştene. Ma do qelem û kamareya Gulîstane û Hêro erdî de meverdê û rayîrê înan de şirê.''

Dima ra mesajê dezgehanê cîya cîyayan ê cinîyan û rojnamegeran ameyî wendene û vera hêrişanê qirkerdişî mesajê xurtkerdişê têkoşînî ameyî dayene.