Serkêşîya Komeleya Kultur, Yewîye, Paştdayîş û Hetkarîye yê bi Keyeyanê ke Dergûşê Medenîyetan de Merdimê Xo Vînî Kerdî (MEBYA-DER) û Hemsereka Federasyonê Komeleyanê Huqûq û Paştdayîşî yê Keyeyanê Tepişte û Hukmwerdeyan (MED TUHAD-FED)  de bi şîarê ''Dem Demê Azadîye yo'' vizêr Silopî de şayayîya şarî ameye kerdene.

Şayîya ke Parka Newroze de ameye kerdene Hemsereka Pêroyî ya DBPyî Salîha Aydenîz û Wekîlê HDPyî Huseyîn Kaçmaz û bi hezaran kesî tewrê ci bîyî. Şayîya ke şar bi kincanê xo yê tradîsyonkî tewrê ci bi de sloganê ''Biciwîyo xovedayîşê zîndanan'' û ''HDP şar o, şar tîya de yo bîyî berz.''

Aktîvîsta TJA Asumane Kultera ke şayîye de verî qisey kerd, semedê şiknayîşê tecrîdê serê Rayberê Şarê Kurdî Abdullah Ocalanî veng da.

Hemserekê HDPyî yê Silopî Kadîr Konurî zî ard ziwan ê do vera hêrişan milê xo çewt nêkerê û sereberz xover bidê.

Hemşaredarê Silopî Adalete Fîdan  û Suleyman Şavlukî zî vera qeyûman hersê xo ard ziwan û vat: ''Şar rixmê heme hêrişan sereberz meydanan de yo.''

Wekîlê HDPyî Huseyîn Kaçmazî bale ante ser ke penîya îqtîdarî ameya û vat: ''Xoverdayîşê şima bi peynîya înan. Dermanê faşîzmî HDP yo.''

Hemserka Pêroyî ya DBPyî Salîha Aydenîz vat: ''Grêvê vêşanîye yê tepişteyanê azadîye roja 233. de ya. Ma înan tîya ra selam kenê. Semedê wedartişê tecrîdê serê Birêz Ocalanî grev de yê. Tecrîd sûcê merdimîye yo ke ganî werte ra bêro wedaritene. Tepişteyî 14ê temmuze ra nata zîndanê açarnayî warê xoverdayîş  û azadîye. Ma zî do heta qedînayîşê tecrîdî xover bidê. Ewro pêro polîtîkayê leyminî pabesteyê tecrîdî yê. Heta ke tecrîd nêro wedaritene nê welat de çîyêk rayîr nêkewo. Semedê amayîşê demokrasîyî ganî verî tecrîd bêro wedaritene.

Semedê azadîya Birêz Ocalanî heme dinya de çalakîyî yenê kerdene. Birêz Ocalan eşkeno Kurdîstan, Tirkîya û Rojhelatê Mîyanênî rê demokrasîyî bîyaro. Aye ro heme dinya vana ke wa Birêz Ocalan bibo azad. Ma zî vanê ke muxatabê meseleya kurdî Birêz Ocalan o. îqtîdaro faşîst ewro hîrê leteyanê Kurdîstanî de şer rayra beno. Şima do heta key şarê kurdî reyde pêrodayîş bikerê? Çareserî şer, tecrîd û qeyûm nêyo.''

Aydenîze vera eşkerayîya Erdoganî yê Erziromî yê 'ajandaya tarîye' zî hersê xo ard ziwan û vat: ''Ajandaya kurdan haştîye û demokrasî yê. Ajandaya şima Roboskî û Dayîka Taybete yê, planê çokdayîşî yo. Planê şima ameyî yew hale ke, nika şima çok danê.''

Aydenîze bale ante muhumîya yewîya kurdan ser û qiseykerdişê xo wina qedîna: ''Wazenê kurdan biqedînê. Kurdî vera nayî têkoşînê pîlî danê. Eke ma ewro yew mebi, nê kayê leyminî vera ma do dewam bikerê. Semedê yew keye û yew leteyî nê ma semedê Kurdîstanî bibê yew.  Ma vanê ke wextê azadîye yo. Wext wextê yewbîyayîşî yo. Semedê şiknayîşê tecrîdê serê Birêz Ocalanî wext wextê pîlkerdişê tekoşînî yo.''

Şayî bi deyîranê Koma Awazên Botanî û hunermendan Merve Admiş û Azad Bedranî û govende qedîyaye.