Raywanîyî estê ke vernîya înan akerde ya û eşkera nêya ke do çi vejîyo vernî; raywanîya ke do meşte eşkera bibo. Mi zî dest bi raywanîyêka winasîye kerd. Ez rayîr de eşqî mûsaya. Ez mûsaya ke ganî merdim senî biewnîro erdî ra. Mi ê kesê ke verê mi nê erdî ser o rayra şîyê yew bi yew nas kerdî.

Serrewextêk bi ke wisarî reng dabi û dorme xemelnabi. Nîsane bî. Xakurkê bi renge zergûnî xemelîyaye bi. Ez qeraxê royî de, pîya bi vayêkê honikî rayra şîya. Bi boya wisarî şa bîyêne. Di cinîyê xasekî vejîyayî vernîya mi. Mi fam kerd; êyê ke şer kenê benê xasek.

Mi a zî ûca nas kerde. A ê kesan ra bîye ke cuye ra xeylî hes kerdêne. Cinîyêka xaseke bîye ke her kar bi hawayêkê serkewteyî kerdêne. Gever ra bî.

Cor ra ameyêne. Teyareyan sey birûskî hêrişê dorî kerdêne. Çend saetî verê înan ma cayê xo de bica bîbî. Serê sibayî vengêko qerbalix ame mi. Komêka gerîlayan bî, heme zî huyayêne. Bombardumanê teyareyanê şerî qe xemê înan nêbi. Bi rîyê xo yê huyayeyî hemverê înan de sereyê xo wedartêne. Gerîlayêka porzere û rîpeşmeryayî bi mi huyaye. Vat, “Ez Sîsere, serê qilî ra yena.” Mi înan ra waşt ke tayê biaresyê, labelê aye amî verê mi û qalê ûcayî mi rê kerd. Aye qisey kerdêne, mi zî bi heyranî aye temaşe kerdêne. Nizdbîyayîşê aye yê zerrî ra ez matmende verdabîya. Gerîlayêk bîye ke aye rê vindertiş çinbi.

Ê seba amadekarîya çalakîyêk ameybî pêser. Komêka gerîlayan bî. Arnos û Sîsere do heman perrî de tewrê çalaki bibîyêne. Arnos gerîlayêko Wanij bi. Serra 2013 de tewrê refanê gerîlayan bibi. Sîsere B7 û Arnosî zî BKC şuxulnayêne. Her di gerîlayî zî koma hêrişî de bîyî. Înan bişewe heme amadekarîyê xo kerdî. Hetêna ra zî seba embazan tayê çîyî tedarik kerdêne.

Çente, cebilxane her çî amade kerdêne. Gerîlayê ke mendêne zî seba înan amadekarîya moralî kerdêne. Gerîla wayîrê kulturêkê bi nê hawayî yê xasekî yo. Heminan deyîrî kerdêne. Vengê Sîsere zî sey aye xasek bi, la a roje ma se kerd nêkerd deyîre nêkerde. Nîmeyê şewe mi aye ra vat, ‘Embaze Sîsere tu eşkena mi rê deyîre bikerê,’ huyaye û vat, ‘seba xatirê to ez do bikerî’ û deyîrêk kerde.

Manaya vateyê ‘embazî’ yeno zanayene. Yeno manaya ‘pîyayî.’ Sîsere zî embaze bî. Yewe bî, yewîye bî. Serê sibayî ê seba çalakîye kewtî rayîr. Mi zî bi rayîrê kamera fikrê înan yew bi yew girewtî. Heme zî biumîd bî. Mi Sîsere ra persa ‘Ti şina çalakîye, eşkena hîsanê xo ma rê qal bikerê’ aye vat, ‘Ez biheyecan a, ma do heyecanê xo bi ser bifînê. Bitaybetî zî ez do qesasê embazanê xo yê şehîdan bigêrî. Ez do qesasê Şehîd Serdem û Şehîd Agirî bigêrî. Ma do dişmenî erdê xo ra teber kerê.’

Gerîla Arnosî yo ke heman çalakîye de ca girewtêne vat, “Na çalakîya ma çalakîya qesasî ya. Ma bi ruhê serkewtişî şinê û ma do bi ser bikewê.” Mi dîmenê heme gerîlayanê ke a roje şîyî çalaki antî.

Mi xeberan ra eşnawit ke Xakurkê de çalakî virazîyaya, çalakîye de bi hawayêkê hemwextî qilê Kevortê, Lêlîkan û Elî Dirêj ameyê pironayene. Bala mi ser de bî. Mi eşnawit ke panc gerîlayî bi hawayêkê fedaîyî resayê şehadetî. E, Sîsere, Arnos, Hawar, Derwîş û Welat çalakîye de şehîd bîyî. Sîsere fedaîyêk bîye ke final de şehîd bî.

Sîser Botane (Garîbe Kiliç), pîya bi Arnos Serhat (Abdullah Erkol), Derwîş Oremar (Sîpan Sevmîş), Hawar Bedran (Serkan Tuncer) û Welat Dîlken (Abdullah Yaşar) 16'ê Adar a 2019’î de Sîdekan de şehîd bîyî.