Baroyê Amedî û Weqfa Tahîr Elçîyî serrgêra 4. a mergê ci de Tahîr Elçî yo ke hetê dewlete ra ame qetilkerdene yad kerd.

Bi seyan avûkatî verê Edlîyeyê Amedî de ameyî pêser û ver bi Mînareyê Çarlingî şîyî. Avûkatan tîya de beyanatêk da. Hemserekê KCDyî Berdan OZturk, Wekîlê HDPyî Salîha Aydenîz, Ebruye Gunay û Merale Daniş Bektaş, Wekîlê CHPyî Sezgîn Tanrikulu û baroyanê Anqara, Aydin, Antalya û Bursa ra 25 kesî tewrê çalakîye bîyî. Dormeyê çalakîye hetê polîsan ra ame girewtene. Rayraşîyayîşî de pankarta bi nuşteyê ''Ma do to xo vîr a nêkerê'' ameye kiriştene û sloganê ''Tahîr Elçî Nêmireno'' û ''Tahîr tîya de yo kiştoxî ça de yê'' ameyî vatene.

Serekê Baroyê Amedî Cîhan Aydinî yadkerdişî de qisey kerd û ard ziwan ke Tirkîya de her ke şono heqê merdiman hîna zêdêr yenê binpaykerdene û xîret yeno kerdene ke dewaya qetilkerdişê Tahîr Elçîyî bêra padayene.

Turkane Elçî qiseykerdişê xo de venga merdeyê xo da û vat: "Nê kuçeyanê tengan de ti bî kêm mergî bîyî zaf. Hêvîya ma, azadîya ma, asanîya ma kêm bîyî. Reyna bê û biqîre ke îşkence sucê merdimîye yo, heq, huqûq û fikirîyayîşo azade çiqas biazamet ê. Bê biqîre ke no senî bêbextîyêk o ke merdimo ke haştîye waştêne peyê ra ame kiştene. Beno ke zulm hîş keno, gonîye hîş kena, çarenusê ma yo bêtalîh rast beno."

Bernameyê yadkerdişî dima ke beşdaran qeranfîlî verê Mînareyê Çarlingî de ronayî qedîya.