Artêşa tirke ya îşxalkere 14ê nîsana 2011î ra nata pê çekanê kîmyewîyan û bombayanê nukleran hêrişê Zap, Avaşîn û Metîna kena û her metodê barbarîye ana ca. Tewr peyên pê dîmanan eşkera bi ke artêşa îşxalkere Warê Xoverdayîşî yê Girê Cûdîyî de 11ê êlula 2022yî de cenazayê leşkeranê xo vêşnayê û dîmenê nê serebûtî ANFyî de weşanîyayî.

Artêşa tirke ya ke Zap de cenazayê xo vêşnayî, 2011 de Farqîn de 13 leşkerê xo yê weşî vêşnabî. 2009 de zî Çelê de bi mayîno ke hetê Fermandarê Tugayî ra ronîyabi, 7 leşkerê tirkî merdbî.

Fermandarê Tugayî: Mi no mayîn kerd tîya

Qezaya Çelê ya Colemêrgî de 17ê gulana 2009î de saete 23.30 de wexto ke wesayîtê leşkeranê tirkan derbaz bîyêne mayînêk teqa û 7 leşkerî merdî. Serfermandarîya Pêroyî ya dewleta tirke îdîa kerd ke mayîn hetê PKKyî ra ameyo cakerdene.

O çax qaşo Serekwezîrê Tirkîya Erdoganî Hemserekê DTPyî Ahmet Turkî de do pêvînayîş bikerdêne la serebûtî ra dima Erdoganî bernameyêkê televîzyonî de vat ke ê do DTP de pêvînayîş nêkerê. Heman roje netîceya weşananê provakatîfan de metropolanê Tirkîya de vera kurdan lînç dest pêkerd.

La HPGyî da zanayene ke yew eleqeyê înan bi nê teqayîşî çin o. Xora PKKyî 2006 de bi îmzakerdişê Peymana Genava Callî şuxilnayîşê mayînan bi hawayêkê tekterefî qedînabi.

Çend mengan ra dima eşkera bi ke mayîno antîpersonel ê bi tîpê M2-A4î  aîdê artêşa tirke yo. Tebaxa heman serre de serê înternetî de qeydêkê vengî weşanîya û ame famkerdene ke no mayîn hetê Fermandarê Tugayî Tuggeneral Esî ra ameyo cakerdene.

Qeydê qiseykerdişê mabênê Tuggeneral Zekî Es û Fermandarê Tumenê Colemêrgî Tumgeneral Gurbuz Kayayî wina yo:

Z.E: Fermandarê mi, heyf ke no mayîn dûrî ra nêame teqnayene.

G.K: Senî?

Z.E: He fermandarê mi. Dûrî ra nêame ronayene. Seke ti zî zanenî mi bi xo no cakerdbi. Ez pêro mesuldarî gêna xo ser.

G.K: Ma pêro mesuldarîye gênê xo ser.

Z.E: Seba ke ez nê domanan bipawa, mi bi xo cakerdbi.

Yewîya Ewropa zî teqayîş kerd milê PKKyî

Serdozgerîya Komare ya Wanî qeydê vengî ser o tehqîqat kerd û pare kerd ke mayîn ê artêşa tirke yo û hetê Fermandarîye ra ronîyayo. Serdozgerîye dima dosya şawite Mehkemeya Leşkerî ya Serfermandarîya Pêroyîye.

Mehkemeya Leşkerî 'îhmalî' ra cezaya zîndanî ya 6 serran û 8 mengan daye Esî. Es wextêk zîndan de mend û dima 2013 de pê îmzaya Erdoganî teqawut bi.

Rixmê hende raştîyan zî seba ke PKKyî dekera 'lîsteya terorî' Yewîya Ewropa no serebût kerd bahane.

Farqîn de leşkerê weşî ameyî vêşnayene

14ê temmuza 2011î de narey qezaya Farqînî ya Amedî de wexto ke Kongreya Komelê Demokratîkî (KCD) amadekarîya îlankerdişê 'Xoserîya Demokratîke' kerdêne eşkera bi ke 13 leşkerê tirkî merdê.

Ame îdîakerdene ke dewa Dolapdere ya Farqînî de netîceya teqayîşê bombaya destan a HPGyî de warê daristanî de şewat vejîyayo û leşkerî wina merdê. A roje eşkerayîya tarîxî ya Hemsereka KCDyî Aysele Tugluk bi nê serebûtî ameye sabotekerdene. Dima vejîya werte ke şewat netîceya bombardumanê artêşa îşxalkere de qewimîyayo û 13 leşkerî hema ke gandar bîyî şewat de vêşayê.

Eşkerayîyê qoricîyêko ke ANFyî rê qisey kerdbi, bi lezî rojdemê Tirkîya de vila bîyê. Qoricîyî vat: ''3-4 rojî yo operasyon dewam kerdêne. Nêzdîyê Şêlima de ma cîhazî ra eşnawit ke şer qewimîyayo. La ma nêşîyî herême. Dima komando û leşkerê bînî şîyî herême. Vengê çekan her cayî ra eşnawîyayêne. Artêşe war da bombayan ver. Dima ma dî ke şewatêko pîl vejîyayo. Mumkîn nîyo ke bombaya destan şewatêkê hende pîlî veja.''

Merdimanê leşkeran derheqê fermandarîya artêşa tirke de gerreyê sûcî kerd. Dima derheqê Fermandarê Alaya Cendirmeyan a Farqînî Albay Mehmet Mûrat Toprak, Fermandarê Tabûra Cendirmeyan ê Taktîkî Serleşker Milbay Şahîn, Fermandarê Bolukê 1. M. Emîn Karagoz û Fermandarê Bolukê 2. fermandar Necmettîn Erdoganî de bi bahaneya 'wezîfeyê xo îstîsmar kerdo' dewa ameye akerdene. La dima nê pêro fermandarî vera dîyayî.