Wekîlê HDPyî yê Êlihî Necdet Îpekyuzî derheqê tecrîdê Îmraliyî û çalakîya grevê vêşanîye yê tepişteyan de qisey kerd.

Îpekyuzî pare kerd ke 22 serrî yo Îmrali de 22 serrî yo tecrîdî mîyan de tecrîd dewam keno û hînî no tecrîd pêro şaran ra vila bîyo. Îpekyuzî vat: ''Raporê CPTyî ra dima hînî warê mîyanneteweyî de zî tecrîd ame qebulkerdene. Birêz Ocalan 22 serrî yo Zîndanê Îmrali de maruzê binpaykerdişê heqan maneno. Tecrîd ne huqûqê zereyî ne zî huqûqê mîyanneteweyî de wayîrê cayêkî yo. Îmrali de krîterê huqûqî yenê binpaykerdene. ''

Îpekyuzî eşkera kerd ke muxalîf û kesê ke polîtîkaya hukmatî qebul nêkenê welat de yenê tecrîdkerdene û vat: ''Tecrîd vurîyayo sîstemê îşkenceyî. Wexto ke Tirkîya û Rojhelatê Mîyanênî de meseleyêke vejîyena werte her kes seba çareserîye şino verê berê Îmraliyî. Pêro pêşnîyaz û fikrê Birêz Ocalanî seba çareserîya meseleya kurdan, Tirkîya û Rojhelatê Mîyanênî yê. Tepişteyê sîyasîyî seba ke tecrîd biqedo grevê vêşanîye kenê. Seba ke çareyêke nêmende tepişteyî kewtî nê rayîrî.''

Îpekyuzî ard ziwan ke nê prosesê janê Korona de rewşa pêro zîndananê Tirkîya xirab a û vat: ''Zîndanan de pêro caardişî sîyasî yê. Dewlete prosesê Korona xo rê kerd firsend. Kurdîstan de bi hezaran merdimî fikranê xo ra semed zîndanan de yê. Koxûşê 10 kesan de 20, tepişteyî manenê. Zîndanan de zulm û tecrîd estê. Meseleyî pê dîyalogan çareser benê pê tecrîd û zulmî ney. Eke tecrîd dewam bikero û wina vila bibo teda û krîzê neweyî do vejîyê werte.''