Temellî: Nameyê ma Dêrsim o, Kurdistan o

Hemserekê HDP’yî yo pêroyî Sezaî Temellîyî tewrê aktîvîteyanê girewtişî yê Festîvala Kultur û Xoza ya Munzurî bi. 

Çarçewaya Festîvala Kultur û Xoza ya Munzurî de hemverê tehrîbbîyayîşê xozaya Dêrsimî rayraşîyayîşêk ame kerdene.

Hemserekê HDP’yî yo pêroyî Sezaî Temellî zî peyê pankartêka pîle de ke bi Tirkî “Ma do Dêrsim de talankerdişê xoza rê rayîr nêdê” û bi Kirmanckî “Erdê xo rê wayîr vejî” nuştebi rayra şi. Rayraşîyayîşo ke parlamenteranê HDP’yî zî tede ca girewt Meydanê Seyît Rizayî de dest pêkerd. Çalakgerî heta Gelo Çeto rayra şîyî.

 Temellîyo ke çalakîye de qiseykerdişêk kerd vat festîvale “xoverdayîşêk” o. Temellîyî vat, “na festîvale xoverdayîşêk o. Na festîvale hemverê kesanê ke kultur û xozaya ma ser o hêriş kenê û kultur û xozaya ma çinê hesibnenê xoverdayîşêk o. Kesanê ke no xoverdayîş viraşto silam bo înan rê, ez înan zî bi hurmet bi vîr ana.”

Temellîyî vat: “Ê çende çin bikerê eslê xo de ê vînî kenê. Çunke ma estê, ma bi name û kulturê xo estê. E, ma Kurd ê, Elewî yê, Sunî yê, ma Tirk ê, bi heme nasnameyanê xo estê. Nameyê ma Dêrsim o, nameyê ma Kurdistan o, ma wina estê û ma do wina bimanê.”

Zozana Şerî

Temellîyî qiseykerdişê xo wina domna: “Ewro hetê ke polîtîkayanê şer û şidetî ra weyî benê, talankerdişê xoza û kolonîzekerdişê kede rê dewam kenê. Belkî zî nimûneyo tewr eşkera Dêrsim o. Kam ke wazeno bizano rejîmê nê welatî ewro çi yo, no welat kamcîn şertan de yo wa bêro Dêrsimî bivîno. Her ca de kozikê çimdarîye, nuqteyê kontrolî û halêkê dorgirewtişî. Zozanêka şerî ya bêsînore amîya awankerdene û wazenê ke senaryoyêk bifînê dewre. La ganî ma nê senaryoyî qetîyen bixerepnê.“

Tena Dêrsim de 10 Hezarî Mayînî Estê

Temellîyî vat: “Awbendan qey îhtîyacîya enerjî nêvirazenê. Seba ke xozaya ma xesp bikerê, muteahîtê înan bibê dewlemend, cêbê înan bibê pirr xozaya ma talan kenê. Na yewe ra ma HES’an ra vanê nê. Zihnîyetê awbendî rê na yewe ra ma vanê nê. Qedexeyê zozanan anê, zîretî kişenê, daristananê ma vêşnenê, polîtîkayêka hêriş û îmhayî ya topyekune rayra benê. Wext ameyo ke ma hemverê nê heme çîyan de vejîyê. Nê welatî de bi hezaran, des hezaran mayînî estê. Tena Dêrsim de 10 hezarî mayînî estê. Netîceyê nê polîtîkayanê şerî de bi se hezaran muhîmmat dorûver de vila bîyo. 

Seke Ceylane ma tîya zî 2 domanê xo vînî kerdî. Ma Nûpelda û Ayazî vînî kerdî. Heta nika ma bi hezaran domanê xo nê şerê leyminî de vînî kerdî. Mesuldarê înan raste de çinê, mesuldarê înan nênê muhakemekerdene û sûc bêceza maneno. Na yewe ra ma vanê ke ma do domananê xo rê wayîr vejîyê, qetîyen ma do vernîya çinkerdişê ameyoxê domananê xo bigêrê. Na yewe ra îthafkerdişê na festîvale bi di domananê ma zaf manîdar o. Ma nê nameyan nêkerê xovîr ra. Ma nêverdê bêrê xovîrrakerdene. Ma hesabê nê bipersê.

Ma do nê mucadeleyî qetîyen qezenc bikerê, hemverê faşîzmî de mucadeleyî berz kerê, ma heme ma do bêrê têhet û vernîya muzekereya demokratîke akerê. Seba ke îradeyê ma yê pîya ciwîyayîşî bica bêro ma do bingeyê waştişê xo yê pêkerdişê cimatkîyî de qanûnêko bingeyên ke tede heqê hemwelatijîya seypêye estê virazê; seba  viraştişê nê ganî ma bêrê têhet.“