Serekê Pêroyî yê Komela Kulturî ya Pîr Sultan Abdalî (PSAKD) Ganî Kaplan, Serekê Pêroyî yê Federasyonê Elewî Bektaşî (ABF) Muslum Metîn, Serekê Pêroyî yê Komeleyanê Kulturî yê Elewîyan Dogan Demîr, Serekê Pêroyî yê Federasyonê Komeleyanê Elewîyan Celal Firat, Hemserekê Komela Elewîyan a Demokratîke (DAD) Mûsa Kûlû, Sekreterê Rêxistinbîyayîşê Federasyonê Elewî Bektaşî Zeynel Odabaş û Parlementerê Partîya Şaran a Demokratîke  (HDP) yê Stenbolî Zeynel Dogan yê ke semedê tayî pêvînayîşan  ameyî Amed Leyla Guvene zîyaret kerde.

Heyet pêvînayîşî ra dima eşkerayîyêk daye. Ganî Kaplanî ard ziwan ke moralê Guvene ca de yo û va: ‘‘Ganî huqûq heme tepişteyan rê seypê bero bicaardene. Tepişteyê sîyasîyî binê tecrîdî de yê. Na bêhuhûqîye ya û nîna qebûlkerdene.‘‘

Mûsa Kûlûyî zî vera tecrîdî reaksîyon da û va: ‘‘Çîyo esas o yo ke merdim  heqê xo yê cuye bişuxulno. Pêvînayîşê avûkat û keyeyanê ke qanûno bingeyên de sey heq yenê zanayene yenê qedexekerdene. No goreyê merdimîye û îtîqatê ma nêno qebûlkerdene. Welat de qanûn goreyê yew merdimî yeno bicaardene.‘‘

Dogan Demîr zî  vist vîrî ke cuye bimbarek o û va: ‘‘Ma hetê partîyêka sîyasîye de nê hetê merdimîye de yê. Ma nêwazenê kesêk bimiro. Ganî merdimî merdiş rê terk mebê û vera naye çîyêk bêro kerdene.‘‘

Zeynel Doganî zî  ard ziwan ke Leyla Guvene moral dayo înan û va: ’’Elewîtîye de merdim bimbarek o. Tecrîd sucê merdimîye yo. Tecrîd tena Birêz Ocalanî rê nê sey zext serê heme komelî de esto. Ê ke wayîrê erjanê merdimî vejîyenê ganî ewro vengê no qîrayîşî bî.’’