Tepişteyê sîyasî yê kurdî Ebdulmutalîb Ehmedîyano ke dewleta Îranî cezaya 30 serran daya ci venga dezgehanê heqanê merdiman ê mîyanneteweyîyan da ke vera neheqîya zîndananê Tirkîya bêveng nêmanê.

Ehmedîyan serra 2016î de zîndanê Saqizî rê dima zî zîndananê Sine, Evîn û Recayî Şehrî yê Kerecî rê ame surgunkerdene. Ehmedîyanî mesajê xo bi rayîrê Aryen TVyî şawit. Mesaj de Ehmedîyanî wina vat: ''Zulm û îşkenceyê zîndananê Tirkîya sîstemê îşkenceyî yê Îmraliyî ra yo. No zî mojneno ke rejîmê tirkan Rayber Apoyî ra çend tersena.''

Ehmedîyanî bale ante grevê vêşanîye yê tepişteyan ser û bêvengîya warê mîyanneteweyî ya vera ney şermezar kerde. Ehmedîyan venga şarê kurdî û dinya da û vat: ''Vera heqanê kurdan tewirê xo bimojnê. Ganî rêxistinê sîyasî û dezgehê heqanê merdiman kerdişanê dewleta tirke şermezar bikerê.''

Ehmedîyanî peynîya mesajê xo de Sakîne Cansiz (Sara), Fîdane Dogan (Rojbîn) û Leyla Şaylemez (Ronahî) yad kerdî û sozê dewamkerdişê têkoşînî da.