Vîrusê Korona bi desan welatan de vila bi. Nê welatan ra yew zî Îran o. Îran de vîrusê Korona ra tewr tay 16 kesî merdî. Na rewşe Wan de bîye semedê qesawet û tersan. Şar semedê vîrusî ra sere de nêweşxaneyan, sûk û meydanan venh keno.

Her çiqas berê sînorî girewte yê zî hemwelatîyê Îranî hema zî yenê Wan. Qesawetî ra şar hînî şaristan de bi maskeyan gêreno. Hemwelatîyê Wanî gerre kenê ke dewlete tebdîranê qîman nêgêna.

Verê cû Wanî de 5 kesî bi şikê vîrusê Korona nêweşxaneyî de binê kontrolî de ameyêne vindertene. Dima ke netîceya testan negatîf vejîyaye panc kesî zî nêweşxaneyî ra vejîyayî.

Serekê Buroyê Wanî yê SESî Sezer Orençî ard ziwan ke dima ke Îran de vîrusî ra merdimî merdî şarê Wanî zî qerqîlîya. Orençî da zanayene ke vilabîyayîşê vîrusê Korona goreyê vîrusanê bînan 10 qatî hîna zêdêr o.

Orençî selahîyetdaran ra waşt ke tebdîran zêdêr bikerê, cayanê karantîna awan bikerê û ekîbmananê qîman amade bikerê ke bi nê hawayî verê vilabîyayîşê Korona bêro girewtene.

Qezaya Tetwanî ya Bedlîsî de zî eşkera bi ke kesêk bi şikê virusê Korona ame berdene bi Nêweşxaneyê Dewlete yê Bedlîsî û nika binê karantîna de yo. Yeno vatene ke şikê Korona ra zaf hemwelatîyan randevuyê xo yê nêweşxaneyî batal kerdî.