Wezîrîya Pawitişî ya Tirkîya bi eşkerayîyanê 25 û 26ê teşrîna peyêne kişîyayîşê 5 leşkeran îtîraf kerdbî. Wezîrîye îdîa kerdbî ke 3 qoricîyî zî birûskî ra birîndar bîyê û nînan ra yew zî dima merdo.

Labelê goreyê xebera Ajansê Mezopotamya rojanê peyênan de tewr tay 17 cenazayî ameyî ardene bi nêweşxaneyanê Colemêrgî û qezayanê ci.

Dîya zanayene ke cenazayê tay leşkeran zî Meydanê Teyarayan ê Geverî de bi teyarayanê kargoyî şaristananê bînan rê erşawîyayê.

Goreyê agahîyan tewr tay 11 leşker û qoricîyê ke şer de birîndar bîyê Çelê û Nêweşxaneyê Sahra de û Nêweşxaneyê Dewlete yê Şemzînanî de yê. 

Ame parekerdene ke qoricîyêk û 3 leşkerî bi giranî birîndar bîyê û wedarîyayê Nêweşxaneyê Cigêrayîş û Perwerdeyî yê Wanî. Dîya zanayene ke leşkeranê payeberzan qereqol û baregehanê leşkerîyan ê serê sînorî de dest nayo telefonanê dîjîtalan ser.

Dew û cayanê nêzdîyê warê şerî de vizêrî ra nata ceyran birîyaye yo. Înternet zî giran bîyo.