Taxa Hêzanî ya Amedî de 28ê hezîranê 2013î de potestokerdişê qaleqolan de Medenî Yildirimo 19 serre hetê leşkeranê tirkan ra amebi qetilkerdene. Derheqê leşkerê bi nameyê Adem Çîftçî de ke bi kiştişê Yildirimî ameyêne sûcdarkerdene dewa amebî akerdene. Roniştişo 9. yê dewa Mehkemeya Cezaya Girane ya 7. ya Amedî de ame dîyene.

Versûc û avûkatê ci bi îdîaya ke odaya musaîde ya SEGBÎSî çin a, tewrê dewa nêbîyî. Cewabê dîyaloganê bi ATK, TUBÎTAK û TRTyî ameyî wendene. Serekê mehkeme pare kerd ke TRT û ATK eşkenê dîmananê başêran bikerê û TUBÎTAKî zî îfade kerd ke ê nêeşkîyî raporê serebûtî amade bikerê. Mehkeme TRTyî ra rapor waştbi la TRTyî 16ê gulana 2019î de mehkeme rê cewab erşawitbi û vatbi ke seba amadekerdişê raporî firsendê înan çin o.

Avûkata Medenî Yildirim vêra pêşkêşkerdişê raporan nêrazîbîyayîşê xo mojna. Avûkat Mehmet Emîn Aktarî zî ard ziwan ke TRT û TUBÎTAK nêwazenê rapor amade bikerê û tewrê cigêrayîşê rastîye bibê. Pawitişanê heyetê mehkeme ra dima roniştiş taloqê 14ê gulane ame kerdene.