Felaketê vewrêsî yo ke qezaya Miksî ya Wanî de qewimîya, mojna ke propagandaya AKPyî ya ke vatêne: ''Ma Miks de rayîrî viraştî, tunelî viraştî'' raşt nîyê. Eşkera bi ke oyo ke ame viraştene têna tunelêko 2 kîlometre yê vewre yo.
Hukmatê AKPyî û Serekkomarê Tirkîya Recep Tayyîp Erdoganî her weçînayîş de vano ke ''Ma Miks de rayîrî viraştî, tunelî viraştî.'' Labelê felaketê vewrêsî yo ke herême de qewimîya bale anceno nê tunelan ser. Tunelo ke ame viraştene têna tunelêko 2 kîlometre yê vewre yo.
Qezaya Miksî de vizêr felaketê vewrêsî qewimîya û 4 kesî binê vewre de mendî, Wesayîtê xelisnayîş-cigêrayîşî zî binê vewre de mendî. Ame îdîakerdene ke wesayîtan de nêzdîyê 25 kesî estbî. Serşêwirdmenda Erdoganî û wekîla verên a Wanî Gulşene Orhan zî binê vewre de mende û ameye berdene bi nêweşxaneyî. Hemşaredaro verên ê HDPyî Galîp Yakût zî binê vewre de mend.
Yeno vatene ke her karo ke herême de yeno kerdene bi semedê vewrêsî. Mabênê Qereqolê Yukari Narlica û herêma vewrêsî de 5 kîlometre esto. Seba ke zimistan de rayîrî padîyenê yeno îdîakerdene ke Mudirîyetê Herêma 11. yê Rayîranê Erdî bi karê xo yê viraştişê tunelê vewre 4 serre verê û Miks de na mesele çareser kerde. Bi vewrêsê peyênî eşkera bi ke no karo ke ame kerdene raşt nîyo.
Endamê Meclîsê Şaredarîye yê HDPyî Bişar Abukanî derheqe babete de qisey kerd û vat: ''Tunelî bi hawayêkê xurtî ameyî viraştene la herêmanê cêrînan de nêameyî viraştene. Mabênê Şax û Miks de se ra se rîsk esto. La tunelê se ra 10 sey xizmetêk yeno pêşkêşkerdene. Tunelê prefabrîkî mesele giranêr kenê.''
