Hemşaredarê Bajarê Girdî yê Mêrdînî Ahmet Turk û Fîgen Altindage mazbatayê xo girewtî. Hemşaredarî şîyî  Heyetê Weçînayîşî yê Bajarî û teba parlementera Mêrdînî ya HDP’yî Ebrû Gunaye û hevşaredaranê qezayan, bi gurbêka qelebalixe mazbatayî girewtî.

Ma do bi heme hêzê xo bixebitîyê

Turkî heme şarê Mêrdîn rê sipas kerd û vat, “Şaredarîyî cayê xiznetî yê. Ma do bi heme hêzê xo xizmetî rê bixebitîyê. Ma do bi heyecanêkê  girdî şarê xo rê xizmet bikerê. Ma do şarê Mêrdînî û rêxistinanê sîvîlanê cimatkî  reyde  bixebitîyê û ma hêvîdar ê ke ma bajar de xeylî çîyanê başan bikerê.”

Grevê Vêşanîye

Hemşaredar Ahmet Turkî derheqê grevê vêşanîye yê seba wedaritişê tecrîdê serê Rayberî Şarê Kurdî Abdullah Ocalanî de zî vat, “Ez vengdayîş Serekkomar û Wezîrê Edaletî rê kena. Hîna ke kesî cuya xo vîndî nêkerda, ganî ma mudaxele bikerê. Ma nêwazanê kes bimiro.”

Hemşaredar Ahmet Turk û heyetî bado ameyî Şaredarîya Bajarê Girdî ya Mêrdînî. Turkî şaredarîye de qisey kerd û vat, “ Ma do hem xebatan şarê xo reyde bikerê. Ma do tu cara heqê kedkeran nêwerê.  Vinetişo ke goreyê pawitişê şarê ma nîyo, helbet goreyê ma zî şarê ma temsîl nêkeno. Ma do nê wareyî de çîyê ke hewca kenê bikerê. Ma do huqûqê karkerd û xebatkaran bipawê.” Hemşaredare Fîgen Altindage zî şarê Mêrdînî rê sipas kerd.