Hemvervatoxanê Partîya Çep a Keske Çîgdeme Kiliçgun Uçar û Îbrahîm Akinî derheqê rolê Rayberê Şarê Kurdî Abdullah Ocalanî û çareserîya meseleya kurdan de Meclîs de bi beşdarîya wekîlan kombîyayîşê çapemenîye kerd.

Çîgdeme Kiliçgun Uçar kombîyayîş de qisey kerd û dîyar kerd ke atmosferê şerî çar hetanê welatî ra vila bîyo. Uçare var: ''Bingeyê pêro meseleyanê welatî de meseleya kurdan est a. Îqtîdar bi redkerdişî çareserîya na mesele nêano ca. La bedelê ney şarê Tirkîya danê. Her ke şer dewam keno xizanîye zêdîyena, bêhuqûqî û bêedaletî zî vurîyenê benê sîstemî. Rejîm bi qiseyê 'asayîşê ma binê tehlukeyî de yo' nanê xizanan birneno û pereyan dano çekan. Birêz Ocalanî vatbi 'eke firsend bidîyo mi ez hewteyêk de eşkena na mesele çareser bikera.' 

Birêz Ocalan çareserîya meseleya kurdan wayîrê perspektîfêkê xurtî yo. Çareserîya meseleya kurdan de meclîs wayîrê mesuldarîyêka tarîxî ya. Ganî şert û mercî bêrê afernayene ke Birêz Abdullah Ocalan bieşko mîsyonê xo bîyaro ca. Vera Birêz Ocalanî 30 mengî yo tecrîdêko mutleq yeno caardene. Şiknayîşê tecrîdî yeno manaya demokrasî û haştîye. 

Meseleya kurdan teyna kurdan ney pêro welatî eleqedar kena. Seba ke tecrîd biqedo ma do ssey Partîya Çep a Keske têkoşînê xo rê dewam bikerê. Kesê ke Tirkîyaya demokratîke wazenê ganî babeta çareserîya haştîyane û demokratîke de bi aktîfî têbigêrê. 

Meclîs seba ke heta nika meseleya kurdan çareser nêkerda ganî xo ra bişermo. Ez bi na wesîle venga pêro partîyanê sîyasîyan û sîyasetmedaranê Meclîsî dana ke mesuldarîyanê xo bîyarê ca. Ma venga Heyetê Merdimanê Aqîlan, cinîyan danê ke vera înkar û çaresernêkerdişî têbigêrê.''