Qezaya Qoserî ya Mêrdînî de 21ê teşrîna peyêne ya 2004î de Ugur Kaymazo 12 serre û babîyê ci Ahmet Kaymaz verê keyeyê xo de bi 13 guleyan ameybî qetilkerdene. Serra 19. de Ugur û babîyê ci taxa Pirîketa de serê goranê xo de ameyî yadkerdene.

Keyeyê Kaymazî, wekîlê HEDEPî û xeylêk kesî tewrê merasîmê yadkerdişî bîyî. Wextê merasîmî de sloganê ''Şehîd namirin'' ame vatene. 

Hemsereka HDPyî ya Qoserî Aysele Ayav îfade kerd ke gorê Ugur Kaymaz û babîyê ci çend reyî raştê hêrişî ameyê kerdene û ê do vera nê ferasetî têkoşîn bikerê.

Wekîla HEDEPî Bêrîtane Guneş ard ziwan ke faîlî yenê pawitene la Ugur Kaymaz sey 'terorîstî' yeno pênasekerdene.

Hemserekê HEDEPî yê Mêrdînî Alaaddîn Turan û Wekîlê HEDEPî Kamuran Tanhanî zî pare kerd ke ê do qetî nê qirkerdişî nêdê vîrakerdene.

Dadîya Ugur Kaymazî Makbule Kaymaz vat: ''Domano 12 serre nêbeno terorîst. 3 reyî kerrayê goranê ma ameyî şiknayene. Ê merganê ma ra çi wazenê?''

Qiseykerdişan ra dima girseyî qeranfîlî nayî goran ser û merasîm bi sloganan qedîya.