Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqan grevê vêşanîye dabi destpêkerdene. Grevê vêşanîye bi koma 5. roja 21. de dewam keno.

Hetkarê Hemserekanê HDPyî yê Huqûq û Heqanê Merdiman ê Berpirsîyar avûkat Umît Dedeyî veng da ke waştişê tepişteyan bêrê caardene.

Umît Dedeyî grevê vêşanîye yê serra 2019-2019î vist vîrî û îfade kerd ke seba ke sozê ke dîyayê nêameyî caardene tepişteyan reyna dest pê grevî kerd.

Umît Dedeyî bale ante ser ke Korona ra rewşa zîndanan cara xirab a û ard ziwan ke ganî îqtîdar goreyê hîşyarîyanê rêxistinanê huqûqî têbigêro.

Umît Dedeyî vat: ''Herinda ke heqê vejîyayîşê teberî û sporî yê tepişteyan bizêdîyê kêmîyayî. Zîndanan de îmkanê tedawî nênê hîrakerdene, tepişteyê nêweşî nêwedariyenê nêweşxane. Kerdişanê karantîna ra zî tay tepişteyî nêwazenê şorê nêweşxane. Destûr nêdîyeno ke tepişteyî rojname biwanê, dest nîyeno radyoyanê înan ser. Goreyê doneyanê ÎHDyî serra 2020î de 46 tepişteyî zîndanan de merdî û heqê tepişteyan asta berze de ameyî binpaykerdene.''

Umît Dedeyî da zanayene ke tepişteyî wazenê tecrîdê Îmraliyî bêro wedaritene, peynîya binpaykerdişê heqan bêra ardene.

Dedeyî vat: ''Destpêkî ra nata vera Birêz Ocalanî tecrîd yeno kerdene. No sîstemê tecrîdî hînî pêro zîndanan de vila bîyo. Mabênê binpaykerdişê heqanê tepişteyan û tecrîdê Îmraliyî de eleqe esto. Cezayê dîsîplînî, binpaykerdişê heqanê nefesgirewtişî, astengkerdişê pêvînayîşan. Nê pêro Îmrali de dest pêkerd û uca ra pêro zîndanan ra vila bîyê. Rejîmê Îmraliyî bi hawayêkê kifşî tesîrê pêro komel û zîndanan keno. Tecrîdê Îmraliyî têna hetê huqûqî ra nê ganî hetê komelkî ra bêro ercnayene. Coka ganî cade waştişê tepişteyan bêrê caardene.''