Rojhelatê Kurdîstanî de bi şîdetê 5.7 Xoy, Salmas û Kotolê de erdlerz qewimîya. Erdlerzî Wanî ser o tesîrêko pîl kerd.

Goreyê wextê Îranî erdlerz saet 09:22 de qewimîya. Erdlerzê şaristanê Xoyî de bi şîdetê 5.9î ame hîskerdene.

Merkezê Afetî yê Ûrmîye pare kerd ke erdlerzî de tay merdiman wefat kerd û bînayî xesar bîyî.

Yeno vatene ke erzlerzî 43 dewanê Ûrmîye rê zerar xesar kerd. 

Selahîyedaranê Îranî derheqê hûmara merdeyan û birîndaran ê dewanê Xoy, Salmasî û Kotole de eşkerayîyêke nêdaye.

Goreyê eşkerayîya Merkezê Sîsmolojîyî yê Zanîngehê Tehranî erdlerz qezaya Kotole de bi şîdetê 5.7î û saete 09:22 de qewimîya.

Eşkerayîye de dayîya zanayene ke şîdetê erdlerzî qezaya Kotole ya Xoyî û şaristanê Salmasî de 5.7 yo.

Serekîya Îdareyê Rewşa Lezabezî û Afetî ya Îranî pare kerd ke şaristanê Xoyî yê Îranî de bi şîdetê 5.9î erdlerzêk qewimîya.

Wan de zaf kesan wefat kerd

Erdlerzî Wanî rê tesîrêko pîl kerd. Yeno vatene ke şaristan de 8 kesan wefat kerd, 3ê înan doman ê. Dewanê Gelenler, Xanikî, Kaşkolî û Elbisê yê pabesteyê Elbaka Wanî de zî erdlerzî ra zaf keyeyî rijîyayî.

Dewa Elbisê de hûmara kesanê ke wefat kerd bîye 4 kesan û yeno vatene ke êyê ke merdî doman ê. Goreyê zanayîşan tîmê xelisnayîşî heta nika nêeşkîyayî xo biresnê dewa Elbisê. Elbisê de dewijî xîret kenê ke bi îmkananê xo binê kerrayan ra merdiman bivejê. Heta nika cenazaya 4 domanan ameyî vetene.

Muxtarê dewa Gelenlerî Ozcanî zî ard ziwan ke tay keyeyî erdlerzî de rijîyayî. Yeno vatene ke zaf heywanî zî murdar bîyî.

Qesawet esto ke hûmara qurbanan biba zêdêr.