Komêka 7 gerîlayan şewa 28-29ê tebaxa 2021î de wexto ke Awa Zapî ra derbaz bîyêne raşta hêrişê PDKyî amebî û netîceya nê hêrişî de panc gerîlayî şehîd bibî. Nê gerîlayanê şehîdan ra yewe zî Tolhildane Raman bîye. Dadîya Tolhildame Ayşane Temîr û waya Tolhildane Evîne Temîr ANFyî rê qisey kerd û da zanayene ke hema zî PDKyî cenaza nêdaya keyeyî.

Dadîye Ayşane vera hêrişanê artêşa tirke yê serê Herêmanê Pawitişî yê Medya nêrazîbîyayîşê xo mojna û vat: ''Hêrişanê vera Rojawanî de heta nika ma 12 hezar şehîdî dayê. Dewleta tirke hem hêrişê şarê ma hem zî hêrişê gerîlayan û şerwananê ma kena. Gerîlayî ewladê ma yê. Ma hêrişanê vera gerîlayan qebul nêkenê. Ma tim hetê nînan de yê.''

Dayîke Ayşane vist vîrî ke a seba ke cenazaya kênaya xo bigêra 111 rojan verê Berê Sînorî yê Sêmalka de beşdara çalakîya xeyme bîya û vat: ''PDKyî kênaya mi şehîd kerde. Destê nînan de gonîya kênaya mi est a. PDK vano ke ê destkewteyanê kurdan pawenê. O çax çira cenaza nêdanê ma? PDK nêwazeno ke kurdî yew bibê. PDK îxanetê kurdan keno.''

Evîne Temîr îfade kerd ke PKK dewaya azadîya kurdan keno la PDK hemkarîya dewleta tirke keno. Evîne vat: ''Tewirê PDKyî şerm o. Eke PDK xo rê vano kurd ganî cenazaya ma bido. Wextê hêrişanê wina giranan de PDK xo nêdano kişta kurdan. Ganî PDK cenazaya waya ma teslîm bikero. Êyê ke azadîye de israr kenê têkoşînê azadîye yê kurdan o. Sey şarê Rojawanî ma tim hetê gerîlayan de yê. Çunke têkoşînê nînan têkoşînê ma yo.''