Merdimê girewteyan ê ke vera tecrîdkerdişê Rayberê Şarê Kurdî Abdullah Ocalanî grevê vêşanîye de yê, qezaya Wêranşarî ya Riha de dest bi çalakîya nobete kerde.

Çalakîya nobete banê HDP'yî yê qeza de yena viraştene. Parlamentera HDP'yî ya Riha Ayşe Surucu, endamê Meclîsê Dayîkanê Aştîye yê Pirsûsî, merdimê girewteyan ê ke grevê vêşanîyede yê û xeylî kesî tewrê çalakîye bîyî. Merdiman ê girewteyan verê destpêkerdişê çalakîye vernîya banê partîye de eşkerayîye daye.

Parlamentera HDP'yî ya Riha Ayşe Surucu ard ziwan ke tecrîdkerdişê Ocalanî tecrîdkerdişê şaranê Tirkîya yo û wina va: ‘’Tecrîd sucê vera merdimîye yo. Dewlete wazena her kesî bikera hemparê na polîtîka.  Ganî her kes her ca de vera na polîtîka vengê xo berz bikero . Roje roja temaşekerdişî nîya, roje  roja girdkeridşê xoverdayîşî ya.’’

Dayîka Mehmet Kanar o ke 1'ê Adare ra nata grevê vêşanîye de yo Necla Kanare vat, “Ma wazenê no zulm êdî bêro vindernayene. Ma qebûl nêkenê ke domanê ma verê çimanê ma de bihelîyê. Êdî bes o.” Eşkerayîye ra dima çalakîye nobete dest pêkerd.