Tepişteyo sîyasî yo kurd Hemîd Hisên Nejad Heydarunlu hema zî binê tehlukeyê cezaya dardekerdişî de yo. Bire dîyabî ke Heyderanluyo ke Zîndanê Ûrmîye de tepişte yo 18ê nîsane de biameyêne dardekerdene. La çalakîya keyeyî ya verê zîndanî ra ceza amebî taloqkerdene.

Keyeyê Heyderanluyî Temsîlkarîya Taybete ya Heqanê Merdiman a Neteweyanê Yewbîyayeyan rê û Rêxistina Efû ya Mîyanneteweyîye (Amnesty) rê zî mesaj şawit. 

Mesaj de keyeyî waşt ke wa vera cezaya dardekerdişî cade ê têbigêrê û  Hemîd Hisên Nejad Heydarunluyo ke zîndan de binê îşkenceyî de yo wa vera bidîyo.

Hemid Hisên Nejad Heydaranlu (39) temmuza 2024î de bi îdîaya ke ‘endamê PKKyî yo’ tepişîya û cezaya zîndanî dîyaye ey.