Şaredarîya Perî ya Dêrsimî ewro destê Hemserekan Songule Dogan û Orhan Çelebî ra ameye girewtene û herinda hemşaredaran de qeyûm ame wezîfedarkerdene. Leşkeranê tirkan serê sibayî eşt bînaya şaredarîye ser.

Wekîlê HDPyî Dilşad Canbaz, Hemserekê Şaredarîya Perî Songule Dogan û Orhan Çelebî, Serekê HDPyî yê Dêrsimî Hidir Çîçek, endamê meclîsê HDPyî Ferhat Yildiz verê bîna de kom bîyî la leşkeran ê nêgirewtî zereyê bînaye. Leşkeran dormeyê bîna girewt û seba naye Çîçekî leşkeran reyde munaqeşe kerd. HDPyîjan îfade kerd ke kesêk teblîgat nêda înan û na bêhuqûqî ya. Hemserek Çelebîyî ard ziwan ke ê qeyûm protesto kenê û do xizmetê şarî dewam bikê. Çelebî vat:"Ganî şarê ma wayîrê şaredarîya xo û îradeyê xo bivejîyo." Beyanatî ra dima hemwelatijan û hemserekan verê bîna de dest pê çalakîya roniştişî kerde.