Vervatoxê Merkezê Îrtîbatî û Çapemenîye yê HPGyî Serdar Yektaşî derheqê rewşa peyêne de qisey kerd, cewab da persanê ANFyî.

Yektaşî derheqê rewşa peyêne ya waranê gerîlayan, hêrişanê muxtemelan ê dewleta tirke û netîceya Kombîyayîşê Konseya Fermandarîya HPGyî de vat: ''Gerîlayî her serre bi heman hîsan Newroze fîraz kenê. Emser zî Newroze bi heybet bîye. Gerîlayan bi ruhê serfîrazîye Newroze fîraz kerde. Newroze seba ma yena manaya destpêkê serra newîye ya têkoşînî.

Xeberî yenê ma ke wisar de dewleta tirke beno ke vera Herêmanê Pawitişî yê Medya û herêmanê cîyayan ê Kurdîstanî hêrişanê îşxalî bikera. Xora nika zî hêrişî û şer est ê. Nika Vakurê Kurdîstanî û Herêmanê Pawitişî yê Medya de payîzî ra nata bêmabên hêriş û operasyonî est ê.

Wezîrîya Karanê Zereyî yê Tirkîya bi eşkerayîyêke vat ke înan 8 mengan de Vakur de 8 hezar operasyonî kerdê. Seba ke ê Zap, Avaşîn û Metîna de aver nêşîyê tay cayan ra xo apey ant. Herêmanê Pawitişî yê Medya ser o tim drone û teyarayê şerî gêrenê, bombarduman kenê. Hûmara teyarayanê ke Herêmanê Pawitişî yê Medya ser o gêrenê hûmara teyarayanê ke Ukrayna ser o gêrenê ra hîna zêde yê. Waranê gerîlayan de tim hêriş û operasyonî est ê. Seba ke gerîlayî resayî a aste ke eşkenê nê çîyan pûç bikerê û artêşa tirke nêeşkena netîce bigêra, wina fam beno ke seke hêriş û operasyonî çin ê.

Beno ke dewleta tirke operasyon bikera. Verê ma de dişmenêko winasên est o ke wazeno ma qir bikero. Seba ke dişmenî par Herêmanê Pawitişî yê Medya de hende derbî werdî û îdîayê xo nêardî ca coka nika hende vindena. Garê ra dima hêzê înan qels bi. Avaşîn, Zap û Metîna de artêşa tirke bin kewte.Dewleta tirke wazena hêriş bikera la seba ney ganî hêzanê xo amade biikera. No zî rewşa înan eşkera keno. Ê wazenê mîyanê kurdan de zî xayînîye awan bikerê coka têgêrenê.

Kombîyayîşê ma yê Konseya Fermandarîye ya serrane cewabê qîmî dayî. Projeyê Xoawankerdişî yê HPGyî û taktîkê neweyî yê gerîlayan heta astêka girînge kewtî pratîkî. La no projeyêko winasên o ke tim geş beno. Gerîlayî hêzê winasên ê ke tim xo perwerde kenê, pratîk kenê, qelsî û kêmasîyanê xo ra tecrubeyan gênê û goreyê nînan xo newe kenê. Şerê 2021î de tecrubeyê girîngî gêrîyayî, warê îdeolojîk û leşkerîye de amadekarî ameyî kerdene. Gerîlayî amade yê û seba şerî aktîf ê. Gerîlayî ne pabeyê dişmenî yê, ne zî goreyê dişmenî pozîsyon gênê.

Dişmen eşkera keno ke 3 menganê peyênan de bi hezaran operasyon kerd. Eke merdim wisarî ra ney bercnê beno des hezar. Seba dewleta tirke armancê înan pûç bîyê. 2021 de wexto ke embazê ma baregehê xo viraştî Dêrsim û Mêrdîn de tay şehadetî qewimîyayî û xora ma no şarî xo rê vat. La nê bi desan operasyonî bênetîce mendî, zerarêk nêresa embazanê ma ser. Embazê ma resayî a aste ke eşkenê pêro teknîkê dişmenî hewa û erdî ra bêtesîr bikerê û nê operasyonan pûç bikerê. Coka Vakurê Kurdîstanî de înîsîyatîf destê gerîlayan de yo.

Dewleta tirke derheqê hûmara şehadetanê gerîlayan de zûran kena. Wezîrê Karanê Zereyî hende rîyê xo eşkera kerd ke hînî burokratê wezîrîye eşkerayîyan danê. Wezîrîya Pawitişî yê Tirkîya wexto ke derheqê şehadetê gerîlayan de eşkerayîye daye, Wezîrîya Karanê Zereyî zî seba ke înan ra kêm nêba eşkerayîye daye. Nê eşkerayîyî nakokîyê mabênê înan mojnenê. Herêmanê Pawitişî yê Medya de 2022yî ra heta nika 7 embazê ma şehîd bîyî. 23ê çeleyî de 3 embazê ma şehîd bîyî û rojanê peyênan de zî 4 embazê ma şehîd bîyî. Vakur de şehadetêk nêqewimîya. Çîyê ke dewleta tirke vana zûr ê.

Tempoyê çalakîyanê gerîlayan goreyê şertanê mewsîman vurîyenê la qetî nêvindertenê. Gerîlayan çele de, sibate de da pirp, 8ê Adare, Newroze û Hewteyê Qehremanîye de çalakîy zêdîyayî. Ma bawer ê ke mîyanê serre de nê çalakîyî bizêdîyê. 2022 ra nata dewleta tirke 312 reyî bi teyarayan, 30 reyî bi helîkopteran bi temamî 342 reyî hêrişê hewayî kerdî. Erdî ra 10 reyî obus û hawanî eştî. Xeylêk reyî warî dîyayî bombayan ver. Vera nê hêrişan gerîlayan 20 çalakîy kerdî, 23 îşxalkerî ceza kerdî û 2 îşxalkerî zî birîndar bîyî. Tay çalakîyan de beno ke hûmara kişte û birîndaran nêameye tesbîtkerdene. La dewlete seba çalakîyanê gerîlayan eşkerayîye nêdana û bêhêzîya xo nimnena. Embazê ma seba ke zûranê dewlete zanenê çalakîyan qeyd kenê û resnenê verê destê ma. Ma nê çîyan Gerîla TV de weşanenê. Ma se kerdo do vajê, ne kêm ne zî zêde.

Sîstemê modernîteya kapîtalîste û kolonyalîste seba ke têgêrayîşê azadîye û gerîlayî xo îfade mekerê wazeno her çî bikero. Gerîla TV vera ney raştîyan resneno.Nika organanê medyaya dîjîtale de Gerîla TV qedexekerde yo. Dewleta tirke çend zûran bikera zî ma çalakîyanê xo qeyd kenê û weşanenê. Gerîla TV perwerde, cû, hîs û her çîyanê gerîlayan weşaneno. Şarê ma zî eleqeyêkê pîlî mojneno Gerîla TV. Embazê ma kedêka pîle danê kanale.

PDK zî tewrê şerê vera gerîlayan do bibo. Çimeyanê herêmîyan ra xeberê winasênî yenê. La ma nêzanenê ke nê çend raşt ê. Hêzê PDKyî par bi provakasyonî kewtbî waranê gerîlayan û hema zî nê cayan ra nêşîyê. Zanîyeno ke na rewşe tehlukeyîn a. Mengêke verî zî PDKyî hêzê xo Heftanîn de ca kerdbî. Dima ameyî Metîna û Kela Qumrîyê. Agahîyî yenê ma ke PDK nêverdeno şarê ma Metîna, Şeladizê û dormeyê Amedîyê de gerîlayan reyde têkilîye rono û tedaya dewijan keno.

Zanîyeno ke PDK vera gerîlayan pozîsyonê senînî de bi. Ma wazenê ke emser heman çi nêvurîyo. Seba ke şarê ma xo serkewtişê dewaya azadîye rê amade kerdo û vera nê xîretanê provakatîfan wayîrê tewir o. Hînî tehamulê şarê ma nêmendo. Ma naye ra bi mesuldarîya xo têgêrenê.''