Qezaya Sarayî ya Wanî de vewrês ginabi serê mînîbusêke û wesayîtêkê karî ro û 5 kesî merdbi 6 kesî zî birîndar bibî. Ekîbê xelisnayîşî û cigêrayîşî binê vewre de gêrayêne 2 kesan. Ewro vewrês reyna ame war. 50 kesî binê vewrêsî de mendî ke endamê tîmê xelisnayîşî û cigêrayîşî zî tede yê.

Vewrêsê diyînî ra dima herême rê ekîbê zêdêrî ameyî sewqkerdene û heta nika 25 kesî binê vewrêsî ra ameyî xelisnayene û ameyî berdene bi nêweşxaneyî. Xebatê xelisnayîşî û cigêrayîşî yê seba kesanê bînan dewam kenê.

8 kesan wefat kerd

Walîyê Wanî Mehmet Emîn Bîlmezî vat: ''Vewrês gina serê tîmê AFAD û UMKE yê ke herême de xebata xelisnayîşî û cigêrayîşî kerdêne.''

Şaredarê Sarayî Mekî Arvasî zî bernameyêkê televîzyonî de vat: ''Ma pê hayîdar bîyî  ke 25 kesî ameyî xelisnayene. Zaf mij esto. Herême de 300 kesî xebitîyayêne û înan ra 50 kesî binê vewrêsî de mendî. '' Avrasî da zanayene ke 8 kesan wefat kerd û 20 kesî yenê cigêrayene.