Binpaykerdişê heqanê tepişteyan her roje benê zêdêr. Hetê bînî ra zaf tepişteyê nêweşî zî zîndanan de estî û rewşa înan astêka bitehluke de ya. Nê tepişteyan ra yew zî Adnan Yalçin o. Waya Adnan Yalçinî Nurcane Yalçin pare kerd ke birayê aye 24 serr ê ke zîndan de yeno tepiştene û tede nêweşîya kanserî esto. Yalçine vat birayê aye nêno dermankerdene û waşt ke pêro tepişteyî bêrê veradayene.

Adnan Yalçin serra 1996î de ame tepiştene û ci rê 36 serrî cezaya zîndanî ameye dayene. 24 serr ê ke Yalçin tepişte yo. Wexto ke Yalçin amebi tepiştene tede nêweşîya fitiqî estbî. Şert û mercanê xiraban ra zîndan de tede nêweşîya kanserê roqila zî peyda bîye. Serra 2015î de Yalçin amelîyat bi û pêro roqilayê ci ameyî girewtene. Mesuldaranê zîndanî da zanayene ke Yalçin nêeşkeno zîndan de bimano la Dezgehê Tipa Edlîyî bi bahaneya ''eşkeno têna biciwîyo'' verê veradayîşê Yalçinî girewt.

Waya Yalçinî Nurcane Yalçin vat: ''Rewşa tepişteyanê neweşan goreyê menfaatanê hukmatî yenê ercnayene. Ma sey keye û merdimanê tepişteyan wazenê ke no sîstemê vera tepişteyanê nêweşan bêro vurnayene û tepişteyê nêweşî bêrê veradayene.

Zîndananê Tirkîya de kiştox û tecawuzkerî yenê veradayene. Ma polîtîkaya AKPyî ya vera tepişteyan şermezar kenê. Ganî birayê mi teber de bêro dermankerdene la bi serran o ke dewlete birayê min ê nêweşî rê zulm keno. Eke no îşkence nîyo, çî yo? Ez naye AKP rê persena. AKP hemkaranê xo yew bi yew vera dano la tepşteyanê nêweşan terkê mergî keno. Ganî cade no tewir bêro vurnayene û tepişteyê nêweşî bêrê veradayene.

Ez venga DEMMî û CPTyî kena ke seba tepişteyanê nêweşan bikewê dewre. Destê înan ra çi bêro wa bikerê.''