DBPyî waştêne ke parka Feqîyê Teyranî ya Wanî de bi şîarê 'Wext wextê yewîya neteweyî û azadîye yo' eşkerayîye bido la polîsan parke girewte binê ablûqa. 

Hemserekê KCDyî Bedran Ozturkî, Hemserekanê DBPyî Salîha Aydenîz û Keskîn Bayindir û xeylêk hemwelatîyî ameybî parke. Polîsanê tirkan pê wesayîtê zirxînî dormeyê parke girewt û nêverda ke kes dekewo parke.  Rixmê terorê polîsan endamê partî û şar pê slogananê 'teda nêeşkena çimê ma bitersna', 'bêserek cuye nêbena' xo ver danê. Parke ser o teyarayî zî gêrenê. Dima ke şar ver bi Rêxistina HDPyî ya Rêya Armûşî dest pê rayraşîyayîşî kerd polîsan pê awa tazyîkînî û bombaya gazî hêrişê şarî kerd.

Şar bi slogan û tîlîlîyan derbazê verê bînaya partî bi. Tîya eşkerayîye ameye dayene.

Bedran Ozturko ke eşkerayîye de qisey kerd, ard ziwan ke ê paştî danê tepişteyanê ke grevê vêşanîye de yê û vat: ''Rixmê heme hêrişan şarê kurdî çirey mucadeleyê xo canêverda, tim wayîr ziwan û estbîyayîşê xo vejîya.  Nika wextê yewîya neteweyîye yo. Vera hêrişanê vera kurdan ganî ma bibê yew. Yeno waştene ke mabênê kurdan de pêkewtiş vejîo. Şarê kurdî wa meseleyanê mabênê xo bi rayîrê dîplomasî çareser bikero. Ma sey têgêrayîşanê kurdan mesuldarê ke waştişê şarê kurdî bîyarê ca û pîya têbigêrê. Hukmato ke peynîya ci bîya nizdî tecrîdê Îmraliyî xorî kerdo. Coka zîndanan de reyna grevê vêşanîye ame destpêkerdene. Ma tîya ra îlan kenê eke zîndanan de çîyêko xirab bibo mesuldarê nayî îqtîdarê AKP û MHPyî yo. Wa nayî bizanê ke mucadeleyê şarê ma do reyna tecrîdî bişikno. Ganî birêz Demîrtaş û pêroyê tepişteyê sîyasîyî bêrê veradayene. Heta azadkerdişê şarê ma û wedartişê tecrîdî do mucadeleyê ma dewam bikero. Eke yewîya neteweyîye bêro caardene şarê kurdî beno azad.''

Salîha Aydenîz zî vera hêrişê polîsan hêrsê xo ard ziwan û vat:  ''Ganî qet kurdêk/e kurdê/a bînî/e rê xirabîye nêkero.  Ganî qet hêzêkê kurdan hêzê bînî yê kurdan sey hedefî megiro. Kam ke vera yewîya neteweyîye vindero vînîkerdişî rê mehkum o. Ganî heme şarê Tirkîya vîno ke ma hînî milê xo çewt nêkenê. Do heme dinya bivîno ke dişmenîya vera kurdan dana vînkerdene. Wexto ke tecrîd darîyene we şarê Tirîya nefeso rehet geno. Ganî tecrîdê serê birêz Abdullah Ocalanî cade bêro wedaritene, qerarê MHME bêro caardene û birêz Demîrtaş û heme tepişteyê sîyasîyî bêrê veradayene. Ma veng danê heme hêzanê demokrasîyî ke seba ke nê bêrê caardene wa hîsgêr têbigêrê.''

Badê eşkerayîye polîsan gazê bîberî hêrişê şarê ke kuçeyan de slogan eştêne kerd.