Y.ya 16 serre ya ke Dibistana Amedeyîya Nîzamettîn Aktaşî ya Bêgirî de wanena, peynîya 2019î ra heta destpêkê na serre ameye musnayene bi madeyanê kundoxî û dima zî ci rê bi hawayêkê sîstematîkî tecawuz ame kerdene. Y. bi bahaneya şuxilnayîşê kundoxî dibistane ra ameye dûrvistene. Polîsî zî tede kesê ke dîmenê Y. antê dima înan bi dîmenan Y. rê şantaj kerd û bi serran ci rê tecawuz kerd.

Serebûtê tecawuzî 4 rojî verî eşkera bi. Wexto ke bînayêka venge de Y. rê tecawuz ameyêne kerdene Y. qîraye û kesêkî vengê aye eşnawit. Dima 6 kesî ameyî destbendkerdene. 6 kesan ra 2 kesî bi şertê kontrolê edlîyî vera dîyayî, 4 kesê bînî hema nezaret de yê.

Y. asayîş de qala tecawuzê sîstematîkî kerde û 7ê polîsî zî tede yê gerreyê 40 kesanê tecawuzkerdan kerd. Mîyanê nê 40 kesan de wezîfedarê qeymeqamîye û sîyasetmedarê herême zî est ê. Y. îfade de vat ke dibistane de mamostayê ci a xapînaye, berde cayêkî û tîya de hetê wezîfedarê dewlete ra ci rê tecawuz ameyo kerdene.

Dîya zanayene ke tay sîyasetmedar û îdarekarê dezgehanê qeza seba nimnayîşê serebûtî tedaya keyeyê Y. û mehkeme kenê.

Tehqîqatê serebûtî dewam keno û Y. ameye berdene bi Mudirîya Xizmetanê Komelkîyan a Wanî.