Wan de nan çin o

Vaybîyayîşê ardan û berhemanê bînan ra Wan de wayîrê firinan çend rojî yo nan nêalewenê. Wan û qezayanê ci de şar nêeşkeno market û firinan ra nanî peyda bikero.

Polîtîkayanê şerî yê AKP-MHPyî ra krîzo ekonomîk her ke şino beno giranêr.

Vaybîyayîşê ardan, heqê ceyranî, gazê xozayî û berhemanê bînan ra Wan de wayîrê firinan çend rojî yo nan nêalewenê. Wan û qezayanê ci de şar nêeşkeno market û firinan ra nanî peyda bikero. Wan de 7 menganê peyênan de nan vera vay bi.

Wayîrê firinan wazeno wa nanêk bibo 4 yan zî 5 lîra ke nika 2,5 lîra yo.

Wayîrê firinî Cevdet Demîrî vat: ''Seba ke şarê ma mexdûr nêbo, ma bi zerarî nanî roşenê la hînî qewetê ma nêmendo. Pereyê ma ardan rê nêvejîyeno. Bi mengan o ma nêeşkenê kîra bidê, heqê karkeran bidê. Ganî nan bêro vaykerdene. Eke wina nêbo firinî do biqefilîyê.''

Emîn Fîdanî zî pare kerd ke ê çend rojî yo nêeşkenê firin û marketan ra nanî peyda bikerê.