Qezaya Pirsûsî ya Riha de wextê xebata weçînayîşî de endamê Heyetê Caardişî yê Merkezê AKPyî û namzetê AKPyî yê Riha Îbrahîm Halîl Yildiz bi zorî dekewtibi dikanê keyeyê Şenyaşarî û seba ke keyeyî nêwaşt seba înan proganda biko ferman da terefgîranê xo ke hêrişê keyeyî bikê. Merdim û terefgîrê Yildizî zî ameyî dikan û Fadik Adîl, Muhammed, Mehmet, Ferît û Celal Şenyaşar birîndar kerdî. Dima şîyî nêweşxane û 3 endamê keyeyê Şenyaşarî qetil kerdî. Fadil Şenyaşaro birîndar 3 rojan ra dima bi sucdarîya ke avûkatê Yildizî û birayê ey kiştî 17ê hezîrane de ame tepiştene û berdene bi Zîndanê Xarpêtî. 17 mengî vîyartî la hema zî Serdozgerîya Riha dosya hukmnêkerde.

Dayîka Şenyaşare: Waştêne mi bikişê

Dayîka Şenyaşare Emîne Şenyaşar ANFyî reyde qisey kerd û vat: "Lajêkê mi tepişte yo. Êyê ke dikan de birîndar bîyî ameyî kiştene. Wexto ke mi rê vat çi ameyê domanan mi ser o ez cade şîya nêweşxane. Rayîrî de mî mêrdeyê xo Hecî dî. Ma pîya şîyî. Wexto ke ma resayî nêweşxane hêrişê mi û mêrdeyê mi kerdî. Ez berde cayê cinîyan. Çunke waştêne mi bikişê."

Şenyaşare eşkera kerd ke dimenê kameraya dikanan û nêweşxaneyî bi fermanê Yildizî hetê polîsdan ra ameyî cakerdene û vat: "Çira hukmat nê dîmenan pak keno? Çunke wazeno ke Halîl Yildiz nêro hukmkerdene."

Mêrdeyê Mi Verê Çimanê Mi de Kişt

Şenyaşare pare kerd ke hêrişî ra dima hemşîre û doktoran îstîfa kerd û vat: "Hemşîre û doktoran vatêne ke înan barbarîya winasêne nêdîye. Bi gonîya domananê mi nêweşxane boyak kerd. Heman şewe nêweşxane newe ra ame boyaxkerdene. Nê pêro verê çimanê leşker û polîsan de bîyî. Mêrdeyê mi verê çimanê mi de ame qetilkerdene."

Şenyaşare ard ziwan ke lajê ey tepişte yo labelê kesê ke ê kiştî teberî de gêrenê û vat: "Ma şinê gorîstan polîsî ma teqîb kenê. Ma şinê merkezê Riha yan zî cayêkê bîn ma teqîb kenê. Ma ra çi wazenê?"

Ferît Şenyaşaro ke wextê qirkerdişî de birîndar bi û nika rewşa ci ya weşîye baş o vat: "Serrêk û nême vîyarte la derheqê dewa de çîyêk nêame kerdene. Seke roja destpêke ya. Ma rê vanê ke birra nêpeynîye esta. Labelê hetê bînî ra senî wazenê fek dosya ra vera bidê?"

Şenyaşarî venga baroyê Amedî û baroyanê herême da ke paştî bidê înan.