Dêrsîmo ke bi serran o yeno waştene ke elewîyê ci bêrê asîmîlerdene de bi paştdayîşê dewlete xeylêk tarîqatî binê nameyê komele, dezgehê paştdayîşî, keyeyê kitaban û waqifan de ameyî ronayene. Nê tarîqatî herinda cayê Fetullah Gulenî ke bîyo veng de xo ca kenê, cehd kenê ke qoqê elewîtîya kizilbaşî bikenenê.

Yeno vatene ke taxa Ataturkî de sey paralelê nê tarîqatan cayê karî ameyî akerdene. Nê awanîyî bajar de ''kolîyanî hetkarîye'' vila kenê û bêpere perwerde danê wendekaranê unîversîte. Temsîlkarê partîyanê sîyasîyan û dezgehanê sîvîlan qewimîyayîşanê leyminan ê Dêrsimî ra înan berpirsîyar vînenê.

Îdarêkarê Merkezê Cigêrayîşanê Dêrsimî (DAM) Selman Yeşilgozî rewşê ercna. Yeşîlî ard ziwan ke înan sey DAMî vet werte ke bi tarîqatî bi sîstematîkî xo rêxistin kenê û vat:  ''Dêrsimo ke sey merkezê îtîqatê elewîyano nê tarîqatî sey leteyê poltîkaya dewlete têgêrenê. Walîyo verên ê Dêrsimî Tucay Sonelî Dêrsim de motîfê beyraqê daliqnayî bî û vatêne ma hedef kenê ke her doman/e bi nê sembolan pîl bibo ke ameyox de tîya bibedîlîyo. Unîversîteyê Munzurî de wendakarê ke bajaranê kurdan ra ameyî estê. Wazenê ke nasnameyêkî çîn bikerê û elewîtîya newî biafernê. Nê polîtkayî Amed û Êlih de cîya yenê caardene. Her herême de ciya şuxulnenê. Berpirsîyarîya ma perûne pîl a. Ganî ma tîya înan rê veng meverdê. Na mesele têna bi yew partî dezgeh û sendîka hal nêbena. Dêrsim yewbîyayîş hewce keno. Heme dezgehê ke bi nameyê Dêrsimî têgêrenê ganî vera nê tarîqatan tewira hempare ramojnê.''