Kurdistan û Tirkîya de 31’ê Adare de weçinitişê cayîyî ameyî viraştene. Rixmo ke 10 rojî ser ra ravêrtê munaqeşeyî hewna zî dewam kenê. Qeza û bajaranê ke AKP înan de bin kewto, hewna zî hîlekarîyî yenê kerdene. Wêranşarê Riha de yo ke serra 1999 ra nata destê tradisyonê HDP’yî de ya, vejîya werte ke roja weçînitişî sîrkulasyonêko leşkerî virazîyayo.

Goreyê atmosferê verê weçînitişî bi çimêkê qetîyî ameyêne pawitene ke do namzedê HDP’yî Roza Yazmaci û Hidir Oktay bêrê weçînitene. Roja weçînitişî de parlamenterê Riha yê AKP’yî û namzedê ci yê Wêranşarî Salîh Ekîncî qeza de bi sîlehan gêrayî û şarî ser o zextî kerdî. Wextê hûmaritişî de îtîrazê endamanê HDP’yî hetê leşker û polîsanê AKP’yî ra ame redkerdene. Tayê mekteban de zî wezîfedarê HDP’yî nêgîrîyayî zereyê mekteban.

Gama ke rayî Heyetê Weçînitişî yê qeza de ameyêne hûmaritene zî namzedê Wêranşarî yê AKP’yî Salîh Ekîncîyî hemverê HDP’yî de peyam şirawit. Peyam de stratejîya înan vejîyaye werte. Ekîncîyî peyam şirawit endamanê heyete sindoqan ê partîyan rê û muşahidanê înan rê. Peyam de no yeno vatene “Endamê sindoqan, sindoqê ke HDP’yî tede zêde rayî girewtê ma do derheqê înan de di waştişnameyan bidê. Yew seba hûmaritişê rayanê ma yê ke ameyê betalkerdene û yo dîyin zî seba rayanê HDP’yî yê ke ameyê hûmaritine bêrê betalkerdene.”