Halê weşîye yê Nasir Yagizî yo ke 20’ê Teşrîna Peyên a 2018’î ra nata Temsîlkarîya HDP’yî ya Hewlêrî ya Başûrê Kurdistanî de hemverê tecrîdê giranî yê serê Rayberê Şarê Kurdî Abdullah Ocalanî grevê vêşanîye yê bêdem û bêagêrayîşî de bi giran bi.

Yagizo ke halê ci vizêr saetanê şewe de giran bi, ame berdene bi Nêweşxaneyê Jînî. Dimayê kontrolê doktorî ra Yagizî tedawî red kerde û çalakîya xo domneno.

Yagizî 26’ê Sibat a roja 98’ine ya grevî de rîyê giranbîyayîşê halê weşîye ra amebi berdene bi Nêweşxaneyê Parî, la dimayê kontrolan Yagizî tedawî red kerdebî û xoverdayîşê xo domnabi.

Heman wextî de verî zî 1’ê Çele ya 2019’î de zî înan Yagiz roja 73’ine de berdibi nêweşxaneyî. La a game zî Yagizî dimayê kontrolan çalakîya xo domnabî.

Derheqê halê Yagizî de hemsereka Temsîlkarîya HDP’yî ya Başûrê Kurdistanî Muzeyen Guneşe hayîdarî daye ANF’yî. Guneşe vist vîrî ke verê di rojan halê Yagizî giran bibi, la vizêr bişewe hîna giran bîyo û vat, “Naye ser ma o berd Nêweşxaneyê Jînî. Doktoran kontrolê ke lazim bîyî kerdî û rîyê bêtaqetî û zihîfbîyayîşê bedenê ê ra zerrîya ci rind nêdana piro.”

Guneşe da zanayene ke dejê beden û çimanê ê xeylî bîyê vêşî û heta tayê rojan nêeşkeno bivîno zî. Guneşe vat Yagizî tedawî red kerda û çalakîya xo domneno.