Hêrişê dewleta tirke ya îşxalkere yê vera Zap, Metîna û Avaşînî 23ê nîsane ra nata dewam kenê. Artêşa îşxalkere vera gerîlayan çekanê kîmyewîyan, bombaya nuklere ya taktîkî şuxilnena.  

Dewleta tirke bêvengîya dinya ra her roje çeka nuklere ya taktîkî vera gerîlayanê azadîye şuxilnena. Dîmenê wextê teqayîşê na bombaya ke sey 'Hîroşîmayêka Qije' tesîr kena, Warê Karkerî yê Zapî de ameyî girewtene.

Dîmenan de asenı ke artêşa îşxalkere pê bombaya nuklere ya taktîkî hêrişê çeperanê şerî yê Girê Ortê kena.

Reyna hêrişê artêşa îşxalkere yê vera çeperanê Şehîd Zemanî yê Warê Xoverdayîşî yê Girê Hekarî de bombaya nuklere şuxilîyaye ke dîmenê ci hetê ANFyî ra 24ê tebaxa 2022yî de weşanîyayê. Dîmenan de aseno ke tesîrê bomba ra kamera zî lerzena.

Bombayê bi tesîrê 'Hîroşîmayêka Qije'

Bombaya nuklere ya taktîkî sey bombaya atomî ya ke veera Hîroşîma şuxilîyaya tesîr kena û na bomba sey 'bombaya bi tesîrê Hîroşîmaya Qije' şinasîyena.

Korgeneral-Pîlot Erdogan Karakuşo ke artêşa tirke ra teqawut bîyo, adara verêne de bernameyêkê televîzyonî de îtîraf kerdbi ke dewleta tirke çeka nuklere şuxilnena. Karakuşî vatbi: ''Çekê taktîkî yê nuklerî îlaweyê nînan (bomabayanê atomî) nêbenê. Çekê nuklerî yê taktîkî wextêk destê hêzanê ma de zî est bîyî. Yewinanê topeştoxan nê çekî şuxilnayêne. Taxrîbatê nê çekan çew bi xo eyar keno. Yanî bombayê ke erzîyayê Japonya 20 kîloton ê, nê zî nêm kîloton ê.''

Artêşa îşxalkere pê na bomba armanc kena ke tunelanê şerî yê Herêmanê Pawitişî yê Medya îmha bikera.