Merkezê Çapemenî û Îrtîbatî yê HPG’yî eşkerayîyêka nuştekîye daye û detayê çalakîyanê gerîlayan ê Xakurkê û Dêrsimî  pare kerdî.

Eşkerayîya HPG’yî wina ya: ‘’3’ê Tebaxe de hêzanê ma dormeyê  dewa Mislokê ya pabesteya Xakurkê de çalakîyêk viraşte. Çalakîye de leşkerêk ame kiştene 3 leşkerî zî birîndar bîyî. Dimayê çalakîye îşxalkarî dormeyê dewe ra ancîyayî. Heman roje de  Qilê Şehîde Sarya de vera îşxalkaran çalakîya sûîqestî ameye viraştene. Netîceya çalakîye de 2 leşkerî ameyî kiştene 1 zî birîndar bi. Çalakîye ra dima îşxalkaran herême bombardûman kerde. 4’ê Tebexe (ewro) hêzanê ma qirikê Ermûşî de yewîya operasyonî hedef girewte. Çalakîya ke stargeh û mewzîyê dişmenî bitesîr ameyî pirodayene de hûmara merde û birîndaran ê dişmenî zelal nêbîye.

Dêrsim de 8 Leşkerî û 2 Endamê MÎT’î Ameyî Kiştene

2’ê Tebaxe de hêzanê ma yê YJA Starî  qezaya Xozatî ya Dêrsimî de çalakîya sabotajî viraşte. Çalakîya ke  vera konvoyê eskerîyî yê ke Qereqolê Amûtka rê sewqîyat kerdêne rê ameye viraştene 2 wesayîtî ameyî îmhakerdene, 8 leşkerî û 2 endamê MÎT’î ameyî kiştene û 2 zî birîndar bîyî. Yewîya ma ya ke çalakîye viraşte weşûwar resaye cayê xo.

Gever de 6 Gerîlayî Şehîd Bîyî

24’ê Temmuze de artêşa Tirkî rayberîya kontrayê bi nameyê Serdar Şahînî de mintiqaya Gelîyê Êlê ya Geverê Colemêrgî de operasyon da destpêkerdene. Heman roje de mabênê hêzanê ma û leşkeranê Tirkî de pêkewtiş vejîya. Pêkewtişê giranî de 3 embazê ma bi şerkerdişêkê qehremankîyî şehîd bîyî. 25’ê Temmuze de îşxalkaran herême bombardûman kerde. Bombardûmanan de 3 embazê ma şehîd bîyî.

Dêrsim de Operasyon

Artêşa Tirkî ya îşxalkare menga Hezîrane de Dêrsim de operasyonêko hîra da dabi destpêkerdene. Operasyono ke mengêk dewam kerd detayê ci wîna yê:

11’ê Hezîrane de nêzdîyê dewa Hirsizpinarî de yewîya artêşa Tirkî ya ke damî nayêne ro hetê hêzanê ma ra ameye pirodayene, 4 leşkerî ameyî kiştene û 4 zî birîndar bîyî. Yewîya ma ya ke çalakîye viraşte weşûwar resaye cayê xo.

19’ê Hezîrane de teyareyanê şerî yê Tirkî mintiqaya dewa Rabatî bombardûman kerde. Dimayê bombardûmanî pêkewtişan dest pêkerdî. Pêkewtişan de embazêkê ma şehîd bîyo û embazêkê ma zî seba destê dişmenî mekewo bombaya xo xo ser teqnaya û şehîd biyo. Keso bi nameyê Destan zî teslîmê dişmenî bîyo.

23’ê Hezîrane de nêzdîyê dewa Zamekî de mabênê hêzanê ma û îşxalkaran de pêkewtiş vejîyayo. Pêkewtişanê giranan de xeylî leşkerî ameyî kiştene xeylî zî birîndar bîyê. Artêşa Tirkî ya ke erdî ra nêeşkena şirê hêzanê ma ser, herême bombardûman kerde.  4 embazê ma yê ke bi qehremankî şer kerdêne tewrê kerwanê şehîdan bîyê. Keso bi nameyê Sasonî zî deslîmê dişmenî bîyo.

Operasyono ke menga Hezîranî ra dewam keno peyser ancîya la herême de yewîyê nimiteyî estê. Êmbazê ma yê ke operasyon de şehîd bîyî do nasnameyê înan rayapêroyî dir  bêrê parekerdene.

18’ê Temmuze de herêma dewa Şakakî ya merkezê Dêrsimî de operasyonêk ame destptêkerdene. Çarçeweya operasyonî de herême ameye bombardûman kerdene. Hêrişan de 2 embazê ma şehîd bîyê. Operasyon heman roje de peyser ancîya.

Hêrişê Hewayî

Teyareyanê şerî yê Tirkî 2’ê Tebaxe de dormeyê dewa Rosê ya pabesteya Heftanînî û herêma Şehîd Kendalî ya ke mabênê Qilebanê Şirnexî û herêma  Heftanînî de ya bombardûman kerde. 3’ê Tebaxe de dormeyê dewa Yekmalê yê  Gare bombardûman kerd. Netîceya hêrişan de bax û baxçeyanê şarê herême zirar dî.’’