Roniştoxê Şingalî vera peymana PDK-Iraqî ya serê Şingalî pîya wayîrê Asayîşê Êzidxanî û hêzanê xo yê pawitişî vejîyenê ke peymane 9ê teşrîna verêne ya 2020î de ameye îlankerdene.

Şingalijî 57 rojan ra nata verê Asayîşê Êzidxanî de xeyme de bi şîarê 'Ma pêro asayîş ê' çalakîya nobete kenê.

Qeza û bajarekanê Şingalî ra her roje xeylêk kesî û temsîlkarê meclîs û dezgehê Şingalî xeyma çalakîye zîyaret kenê û tewrê çalakîye benê. Şarê Şingalî wazeno ke Asayîşê Êzidxanî û xoserîya Şingalî bi hawayêkê fermî bişinasîyê.

Şarê Şingalî heta nika xeylêk caran waştişê xo pêşkêşê hukmatê Iraqî kerdî la selahîyetdaranê Iraqî hema zî cewabê waştişan nêda.

Hemsereka Meclîsê Dîgorî Edolê Şemoyî derheqê gefanê Serekkomarê Tirkîya Erdoganî yê vera Şingalî de vat: ''Şingal bîyo kelaya xoverdayîşî. Şingal serê fikrê Rayber Apoyî ronîyayo û pê gonîya şehîdan xelisîyayo. Erdogan nêeşkeno wina rehet debikewo Şingal.''

Endamê Meclîsê Şingalî Lokman Hisênî zî vat: ''Babî û bapîranê Erdoganî Osmanijan waştêne êzidîyan werte ra wedarê. La ma heta nika vera ney xo ver da û ma do vera faşîzmê Erdoganî zî xo ver bidê.''