Merkezê Îrtîbatî û Çapemenîye yê HPGyî derheqê hêrişê îşxalî yê dewleta tirke û xoverdayîşê gerîlayan de eşkerayîye daye û nê pare kerdî:

''Dewleta tirke ya îşxalkere Herêmanê Pawitişî yê Medya erd û hewayî ra bombardumanan kena. Rojanê peyênan de bombardumanî zêdîyayî. Bitaybetî mabênê 14-17ê nîsane de vera herêmanê Zap û Avaşînî bombardumanî zêdîyayî. Şewa 17ê nîsane de artêşa tirke vera Avaşîn û Zapî hêrişê îşxalî da destpêkerdene. Goreyê nayî;

Herêma Avaşînî de;

Bîn şewe îşxalkeran warê Werxelê de pê helîkopteran 8 rey leşkerê xo tîya naye ro. Eynî wextî de hetê helîkopteranê hêrişî ra herême dîyaye bombayan ver. Hêzanê ma pê çekanê giranan cewabê îşxalkeran da. Reyna bi çekanê ferdîyan îşxalkerî ameyî hedefgirewtene û pirodayene. Îşxalkeranê ke derbî werdî pê paştdayîşê helîkopteranê hêrişî dewa Werxelê de yew rey leşkerê xo ardî war û merde û birîndarê xo uca ra dartî we.

Saetanê şewe de îşxalkeranê ke waşt xo qilê Werxelê de ca bikerî pê çekanê ferdîyan û otomotîkan ameyî pirodayene. Tîya 2 îşxalkerî ameyî cezakerdene. Teyareyanê şerî saete 02:45 de nê war da bombayan ver. Saete 03:10 de îşxalkeranê ke waşt ver bi warê Werxelê aver şirê bi taktîkê sabotayî ameyî pirodayene. Netîceya çalakîye de 8 îşxalkerî ameyî cezakerdene. Dima ra îşxalkeranê ke waşt tîya bikewê mewzîyan ê zî bi çekanê ferdîyan ameyî pirodayene, 2 îşxalkerî ameyî cezakerdene û 3 îşxalkerî zî birîndar bîyî. Dişmen badê na çalakîye gamêke peyser ancîya.

Ver bi sibayî saete 04:20 de îşxalkeranê ke waşt debikewê warê Werxelê reyna ameyî pirodayene û mecbur mendî ke peyser biancîyê. Saete 05:00 de îşxalkerêko bîn bi taktîkê suîqestî ame cezakerdene. Ewro 09:40 de îşaxalkeranê ke waşt debikewê qilê Werxelê mabênê hêzanê ma û înan de  pêkewitşî dewam kenê.

Herêma Zapî de;

Dewleta tirke ya îşxalkere 14ê nîsane ra heta 17 nîsane pê teyarayanê şerî û obusan warê Kurojahro, Şikefta Birîndara, Ertuş, Şehîd Şahîn, Karker û Çiyareşî dayî bombayan ver. 17ê nîsane de îşxlakeran pê paştdayîşê helîkopteranê hêrişî û droneyan pêro nê herêman de hêrişê îşxalî yo hîra da destpêkerdene.

Îşxalkeran sînorê Vakurê Kurdîstanî ra pê helîkopteran warê Çiyayê Reş, Ertuş, Şikefta Birîndara û Werxelê yê herêma Zapî bombarduman kerdî û kerd ke bi helkopteranê skorskyan nê cayan de leşkeranê xo ca bikero. Hêzanê ma cade mudaxaleyê înan kerd. Naye ser o xeylêk helîkoperan  hema ke leşkerî nênayî ro peyser ancîyayî.Warê Girê Sipî de helîkopterêkê hêrişî hetê hêzanê ma ra ame derbkerdene.

Helîkopterê artêşa tirke qezaya Silopî ya Şirnexî ra wirişt serê waranê Bamernê, Amedîye û Dêrelokî yê ke binê kontrolê PDKyî de yê, ra firdayî û da warê Kurojahro yê herêma Zapî ro. Helîkopteranê ke waşt Kurojahro de leşkeranê xo ronê raştê mudaxaleyê hêzanê ma ameyî û mecbur mendî ke peyser agêrê. Îşxalkeranê ke warê Girê Şehîd Amargî yê warê Kurojahro de rayêk leşkerê xo ardî war hetê hêzanê ma yê YJA Starî ra ameyî pirodayene, 3 îşxalkerî ameyî cezakerdene. Reyna eynî ca de 4 îşxalkerê bînî ameyî cezakerdene. Çalakîyanê YJA Starî de pêro pîya 7 îşxalkerî ameyî cezakerdene.

Hêrişî pê paştdayîşê PDKyî yenê kerdene

Seba ke helîkopterê artêşa tirke sînorê Başûrê Kurdîstanî ra firdanê û tîya hêrişê îşxalî kenê no eşkera keno ke PDKyî planê hêrişî tesdîq kerdo û rayîr dayo ci. Eke hemkarîya PDKyî çînêbîn artêşa tirke nêeşkayêne nê warî de pêra bido gerîlayan ro. Eynî wextî de hêzê dewleta tirke ya îşxalkere Şêladizê de baregehê Sîrê yo ke binê kontrolê hêzanê PDKyî de  ra waşt erdî ra ver bi Kurojahro şirê û tîya xo ca bikerê. Hêzanê ma mudaxale kerd û verê înan girewt. Saetanê şewe de vera Dêralok, Şêladizê û Barzanî têgêrayîşo sixletî yê PDKyî estbi.

Mintiqaya Kevirêkunî yê Şîkefta Birîndara de saetanê şewe de îşxalkerî hetê hêzanê ma ra ameyî pirodayene, 5 îşxalkerî ameyî cezakerdene. Îşxalkerê ke nêeşkayî tîya bimanê ver bi Kanîya Skorskyî peyser ancîyayî. Saetanê erey ê şewe de îşxalkerî reyna ameyî hedefgirewtene, 3 îşxalkerî ameyî cezakerdene û 6 îşxlakerî zî birîndar bîyî. Badê nê çalakîyan Şikefta Birîndara çar rey pê teyarayan ameye bombardumankerdene. Şefeqê sibayî de helîkopteranê hêrişê ke Şikefta Birîndara ser o bombayî varnayî hetê hêzanê ma ra ameyî pirodayene û mecbur mendî ke agêrê. Reyna Werxelê de zî helîkopterî raştê mudaxaleyê hêzanê ma ameyî.

Xeta Çîyareşî de zî îşxalkerê ke erdî ra waştêne aver şirê bi taktîkê sabotajî ameyî pirodayene. Îşxalkeranê ke tîya derbeyî werdî mecbur mendî peyser agêrê. Derheqê naye de do zanayîşo hîra pey ra bêro dayene. Warê Çemçoyî de 2 helîkopterê hêrişî hetê hêzanê ma ra ameyî hedefgirewtene û înan ra yewî derb girewt û warî ra kewt dûrî. Saetanê serê sibayî de xeta Bamernê-Amediye-Dêrelokî ra waşt hêrişê Kurojahro bikerî raştê mudaxaleyê hêzanê ma ameyî û mecbur mendî agêrê.

Têna çar rojanê peyênan de warê ma 147 rey pê teyarayanê şerî û erdî ra zî bêhumare rey pê obusan ameyî bombardumankerdene. Têgêrayîşê SÎHA û teyarayanê şerî herême de bêmabên dewam keno. Têkoşînê hêzanê ma yo ke Avaşîn û Zap de bi ruhê fedayî yeno kerdene pêlê verênî yê hêirşî betal kerd. Heta nika çalakîyanê hêzanê ma de 28 îşxalkerî ameyî cezakerdene, 9 îşxalkerî birîndar bîyî 2 helîkopterê hêrişî ameyî derbkerdene.

Xoverdayîşo qehremankî yê hêzanê ma û pêkewtişê giranî dewam kenê.''