Serewedaritişê şarê Rojhelatê Kurdîstanî Îranî yo ke qetilkerdişê Jîna Emînî ra dima dest pêkerdbi, rixmê qirkerdiş û destbendkerdişan zî dewam keno. Xoverdayîş ewro keweno menga 5ine.

8 qezayanê Tehranî de şamşînan ra sloganê vera dewleta Îranî ameyî qîrayene û ame parekerdene ke heta servistişê armancan çalakîyî do dewam bikerê.

Heman wextî de wendekaranê zanîngehan zî çalakîyê şermezarkerdişî serûber kerdî.

Şaristananê Zencan û Mahşerî de zî grevî ameyî kerdene. Karkeran waşt ke şert û mercê karî wa bêrê sereraştkerdene. 

Ciwanro de zî nameyê 50 destbendkerdeyan ameyî eşkerakerdene. Sine, Seqiz, Dêwlan, Bokan û xeylêk şaristananê bînan de operasyonê destbendkerdişî dewam kenê.

Rixmê xîretê destbendkerdişan zî çalakîyî dewam kenê. Merasîmê yadkerdişê kesanê ameyê qetilkerdene zî bi hawayêkê girseyî dewam kenê.

Destpêkê serewedaritişî ra nata 500 kesî hetê hêzanê dewleta Îranî ra ameyî qetilkerdene ke nînan ra 120 kesî kurd ê. Reyna bi des hezaran kesî ameyî destbendkerdene û cezaya îdamî dîyaye 112 kesan ke nînan ra 4 kesî ameyî dardekerdene.

Şaristanê Strasbourgî yê Fransa de seba wayîrvejîyayîşê xoverdayîşê şarê Rojhelatê Kurdîstanî û Îranî ewro mîtîngêko pîl do bêro kerdene.