Hemsereka PJAKî Zîlane Vejîn cewab da persanê ANFyî û serra 2020î ercnaye.

Qiseykerdişê Zîlane Vejîn ra beşêk wina yo:

''Rojhelatê Kurdîstanî û Belucîstan de xizanîye, bêkarî asta sefaletî de ya. Domanê ke nêeşkenê xizanîye ra şorê mekteb xo kişenê. Domanê kênayî zî nêdîyenê wendene. Xora nê domanî hema ke qij ê dîyenê zewijnayene. Eke na rewşe nêra raştkerdene texrîbê pîlî do xo bimojnê.

Komel prosesê Korona de hetê madî û manewî ra zehmetîyanê pîlan ancenê. La mekanîzmayê îşkence, dardekerdiş, gef, teda û înfazî yê Îranî bêmabên xebitîyenê. Tay muxalîfî hetê Îranî ra ameyî remnayene û dardekerdene. Îstîxbaratê Îranî her tim muxalîf û hunermendan keno hedef. Dewleta tirke ya îşxalkere û dewleta Îranî tay peymanî kerdî Dewleta tirke muxalîfan teslîmê Îranî kena.

Îran keno ke faturaya krîzan şarî rê bibirna. Welat mîyanê xizanîyêka pîle de yo la selahîyetdarê dewlete wayîrê serwetanê pîlan ê.

Îran de vera tepişteyan ê sîyasîyan tedayê giranî estê. Îranî seba ke îradeyê Zeynebe Celalîyan bişikno pêro metodî ceribnayî. La Zeynebe Celalîyan û têkoşînê ci bîyî hêvîya Rojhelatê Kurdîstanî. Tepişteyê sîyasîyî xoverdayîşê ci ra hêz gênê û têkoşînê xo dewam kenê.

Îran bi taybetî vera cinîyan teda keno û keno ke înan têkoşînî ra dûrî bivisno. Îran têna na serre bi seyan ciwanî darde kerdî. Rejîmê Îranî dardekerdiş kerd meşrû. Ciwanî werteyê kuçeyan de yenê kiştene û recmkerdene.

Ma sey PJAKî bi hemleya xo ya 'Dardekerdişî rê Bes o, Wext Wextê Demokrasî yo' armanc kenê ke verê îdaman bigêrê. Rejîm terseno ke hemleya ma do ser bikewa. La ma pê waştişê kurdan û şarê Îranî pê bawer ê ke do ser bikewê.

Rojhelatê Kurdîstanî Hemleya 'Wext Wextê Azadîye yo' zaf veng vet. Kurdî û şarê Îranî na hemle sey temînatê azadîye vînenê. Îran pê teda, tecrîd, dardekerdiş, remnayîş xîret keno ke vengê komelî hîş bikero û komel bivisno binê kontrolê xo. La şarê kurdî, azerî, belûcî, ereb û fersî wayîrê hemle vejîyenê  û vera Îranî vindenê.

Tarîx îsbat keno ke şarê Îranî xoverdayox o. Coka eke Îran waştişanê şarî ca nêaro, demokratîk nêbo û xo nêvurno qetî do birijo.