Dormeyê Şingalî de têgêrayîşê hêzanê Iraqî dewam keno. Hêzanê Iraqî xîret kerdbi ke pê têlan têkilîya dewanê ereban û Şingalî bibirnê la raştê nêrazîbîyayîşê şarî ameyî. Plan vinderto la tehluke dewam keno.

Mabênê Rojawan û Şingalî de zî qasê 250 kîlomtreyan dêsî ronîyenê.

Hemsereka Meclîsê Xoserîya Demokratîke ya Şingalî Xezale Reşo derheqê babete de ANFyî rê qisey kerd.

Xezale vist vîrî ke 2014 de êzidîyan seba ke xo resna sînorê Rojawanî destê DAÎŞî ra xo xelisna û seba ke sînor yeno qefilnayene roniştoxê herême tehlukeyan de têrî manenê. Xezale Reşo vat: ''Yeno xîretkerdene ke ereb û şarê şingalî yewbînan ra cîya bibê. Nê dêsî seba pawitişê Şingalî nê seba ablûqaya vera Şingalî virazîyenê. No plan hetê hukmatê Iraqî, dewleta tirke û PDKyî ra yeno kerdene. DAÎŞ zî Şingal de newe ra xo rêxistin keno.''

Xezale Reşo îfade kerd ke vera nê dêsan sey şarê Şingalî ê do tim payan ser de bibê û vat: ''Ma wazenê erdê xo Şingal de bi azadî biciwîyê. Ewro Şingal prosesêkê tehlukeyînî de yo. Ganî şarê ma vera viraştişê nê dêsan tewirê xo bimojno. Êyê ke nê sînoran nanê ro destûr dabi derbazbîyayîşê DAÎŞî. No planêko gemarin o û ê nêeşkenê şarê ma bixapînê.''