Endamê Konseya Serekîye ya YNKyî Arêz Ebdullahî Rojnewsî rê qisey kerd.

Arêz Ebdullahî bale ante hêrişanê dewleta tirke yê vera Başûrî ser û ard ziwan ke armancê dewleta tirke îşxalkerdişê Başûrî yo. Ebdullahî vat: ''Erdogan, Wezîrê Karanê Zereyî yê Tirkîya û Wezîrê Karanê Teberî bi hawayêkê eşkerayî vanê ke Peymana Lozanî biqeda ê do erdê xo hîra bikerê. Dewleta tirke wazena Mûsil Başûrî ra bigêra. Coka dewleta tirke PKK xo rê kena bahane. 

Eke PKK sînoran ra xo apey bigêro hînî Tirkîya tîya ra nêvejîyena û Başûr îşxal kena. Werrekna PDK nê fikrê xo bivurno û PKK sey sebebê îşxalî nêvîno. Seba dîyaloganê PDK û PKKyî YNK amade yo ke mabênçî bibo. Kurdî ganî meseleyanê xo pê dîyalogan çareser bikerê.''

Arêz Ebdullahî bale ante sewqîyatê leşkerî yê PDKyî ser û vat: ''Goreyê qanûnanê Herêma Kurdîstanî pêşmergeyî eşkenê Zaxo ra heta Qendîlî, Xakûrkê û Sîdakan de ca bibê. La hayîya YNK û Wezaretê Pêşmergeyan pê nê sewqîyatî çinbi. Nê hêzî wextê hêrişanê dewleta tirke de şîyî warê gerîlayan. Eke sewbîna wextêkî de, verê hêrişan de bişîyayêne na mesele bi hawayêkê cîyayî ameyêne ercnayene.

Ganî PKK û PDK yewbînan goştarî bikerê. Wa PKK rewşa Başûrî bigêro verê çiman û PDK zî bivîno ke PKK bahaneya îşxalê tirkan a. Wa wird terefî pê dîyalogan nê meseleyan çareser bikerê. Tirkîya mîyanê planêkê tehlukeyînî de ya, wazena xo biresna Qendîl û cayanê bînan ê Kurdîstanî.''