Endamê Buroyê Sîyasî yê YNKyî Seedî Ehmed Pîre tewrê bernameyê Aryen TVyî bi. Pîreyî paştî daye eşkerayîya Murat Karayilanî.

Pîreyî vat: ''PDKyî Pêşmergeyê Roje sewqê herêma Garê kerdî. Na rewşe seba şerî zemînêk amade kena. Murat Karayilano ke bi serran o şer keno, zaneno ke xirabîya şerî senîn a. Coka ganî ma paştî bidê îfadeyanê Birêz Karayilanî. Tirkîya herêma Behdînanî de serdest a. Mabênê PDK û Tirkîya de xeylêk peymanî virazîyayî la xebera ma pê nînan çin a. Rixmo ke ma mîyanê hukmatî de ca gênê zanayîş nêdîyeno ma.''

Seedî Ehmed Pîre bale ante peymana PDK û Iraqî ya seba Şingalî ser û vat: ''Şarê Şingalî kamyew bire bido ma do paştî bidê înan. Aseno ke şingalijî na peymane qebul nêkenê. Coka ma zî na peymane qebul nêkenê.''

Seedî Ehmed Pîreyî eşkerayîya Encûmenîya Meclîsê Asayîşê Herêma Kurdîstanî viste vîrî û vat: ''Eke Encûmenîye raşt vana ganî nê îdîayan îsbat bikera. Meclîsê Asayîşî wextêkê dergî ra nata nêame pêser ke eşkerayîyêke bido. Mabênê Rêxistina Îstîxbaratî û Meclîsê Asayîşî de mesele û nakokîyî estê. Eke na mesele çareser nêba eşkerayîyê winasênê do bibê zêdêr.''

Pîreyî peynîya qiseykerdişê xo de zî wina vat: ''Îşxalê dewleta tirke yê vera Başûrê Kurdîstanî qet nêno qebulkerdene.''