Koordînaysonê Pêroyî yê YRDyî eşkera kerd ke rojnameger Aziz Koyluoglu şehîd bîyo û nê vatî:

''Hêrişê dewleta tirke de yo ke 27ê çeleyî de Ranya de ame kerdene, embazê ma yo erîjîyaye, hemrayê ma yo sînaye Aziz Koyluoglu şehîd bîyo. Ma sere de keyeyê ci yê erjîyayeyî rê, heme kadroyanê çapemenîya azade rê, şarê xo rê serweşîye wazenê. Ma soz danê ma do têkoşînê xo xurtêr bikerê û miheqeq bi serkewtişî tacîdar bikerê.

Bêşik seba ke embaz Azizî rîyo qirker-îşxalker ê dewleta tirke teşhîr kerd û rojnamegerêko serkewte û mîlîtanê azadîye bi ame hedefgirewtene û qetilkerdene. Ê ke qeleme û vatişanê embaz Azizî ra tersayî hêrişê ci kerd ke vengê heqîqetî bibirnê. La wa no bêro zanayene, senî ke Azîzî no têkoşîn embazanê xo verênan ra dewr girewt ey zî beyraqa têkoşînî dewrê ma kerd, ma do têkoşînê xo xurtêr bikerê.

Embaz Aziz 1976 de Amed de yeno dinya û bi kulturê welatperwerîye beno pîl. Destpêkê 2000an de tewrê tradîsyonê çapemenîya azade beno û hema hema pêro xebatanê ci de ca geno. Hemra Aziz Hewlêrî ra heta Silêmanî, Kerkuk, ûca ra heta Mexmûrî her cayê Başûrê Kurdîstanî de falîyet rayra beno. Rojawanê Kurdîstanî de Derikî ra heta Efrînî her cayê ci de falîyatanê çapemenîye rayra beno. Hemrayê ma  Aziz xebatanê rojname, ajans, televîzyon û tewr peynî de medyaya dîjîtale de wezîfeyo aktîf geno xo ser tim qala muhîmîya xebata çapemenîye keno.

Xora do qelema hemra Azizî erdî de memano, vengê ey do dahîna xurt bêro zimnayene. Erjê têkoşînî ke hemra Azizî xo dima verdayî do hetê her kadroyê çapemenîya azade ra dahîna bêrê xurtkerdene û bibê mîrazê ameyoxê azadî yê şarê ma.

Tradîsyonê çapemenîya azade yo ke çimeyê xo Mazlûman, Gurbetellîyan, Apê Musayan ra geno, bi Seyît, Karwan, Rosîda, Gulîstane, Hero, Nazim û Cîhanan rayîrê xo rê dahîna qerardar dewam keno,  bi şahadetê hemra Azizî dahîna bi hêzdar, reyna ame îspatkerdene ke no tradîsyon do çirey bin mekewo. Dişmeno faşîst se keno wa bikero do meeşko verê çapemenîya azade bigîro. Raştîye do tarîtîye de memanê.''