Fermandaranê YJA Starî ra Sorxwîn Zagrose û fermandaranê HPG’yî ra Zerdeşt Sîpanî vat, ganî AKP netîceyanê weçînitişî ra dersan bigêro û qebûl bikero ke sîyasetê çinkerdişê Kurdan hendî nêeşkeno bêro rayraberdene. Fermandaran bale ante gerîla her halî rê amade yo û mücadeleyê xo domneno.

Fermandaranê YJA Starî ra Sorxwîn Zagrose ard ziwan ke HDP’yî bajaranê Tirkîya de kerd ke tîfaqê AKP-MHP’yî bin bikero, Kurdistan de zî peynîya rejîmê qeyûmî ard û vat, na stratejîya HDP’yî netîceyêkê serkewteyî vet werte.

Zagrose ard ziwan xoverdayîşo ke bi serkêşîya hemsereka KCD’yî Leyla Guvene yeno rayraberdene, hemverê faşîzmî de nizdbîyayîşêko xurt o, tesîrêkê muhîmî weçînitişan ser o kerdo û vat, “Nizdbîyayîşê ‘ma do hemverê faşîzmî de sere nênê ro, şaranê Tirkîya azad bikerê’ netîceyanê weçînitişan de zî xo ramot.”  

Zagrose vat beno ke faşîzmo ke têşanîya hêrişanê xo hîna bikero xurt û vat, “Ma soz danê ke hemverê nê de ma do bibê wayîrê nizdbîyayîşêkê xurtî. Hewn û xeyalê yewperestîye yê Erdoganî bin kewtê. Weçînitişanê cayîyan de waştêne ke sîyasetê qeyûman bi tesîrê panzer û zextê leşkerîyî bidê qebûlkerdene, la no siyaset rixmê zext û zordarîye de zî nêame qebûlkerdene.”

Zagrose ard ziwan ke şans û firsendê ke Rayberê Şarê Kurdî Abdullah Ocalanî pêşkêş kerdî hetê AKP’yî û rayberê ci ra nêameyî vînayene û vat, “AKP ewro serecêr bîyo. Na yewe ra hende hêrişkar o. Ganî hendî serê gonîya şaranê Tirkîya de sîyaset nêkero. Gerîlayê mucadeleyê azadîye do mucadeleyê xo her tim bido dewamkerdene.”

‘Ganî Bêro Dîyene Ke Sîyasetê Qirkerdişî Bêfayde Bîyo’

Fermandaranê HPG’yî ra Zerdeşt Sîpanî zî ard ziwan ke ganî îqtîdarê AKP-MHP’yî hendî bivîno ke sîyasetê qirkerdişî yê hemverê şarê Kurdî bifayde nêyo û vat, “Tîfaqê 17 serran ê AKP’yî têşanîya û nika bin keweno. Ma nê vînenê û ê naye ra hende hêriş kenê, wina aseno ke ê zî pê zanê. Pîya bi heme kay û hîleyanê ke wextê weçînitişî de ameyî kerdene zî nizdbîyayîşêko pîl ê hemverîye ame ramotene. Sewbînî sîyasetê qeyûmî yê AKP’yî Vakurê Kurdistanî de bin kewto. Şarê Kurdî tercîhê xo kerdo. Rixmê gefanê sey ‘tayînkerdişê qeyûman’ tabloyêko winasî vejîya werte û ganî no tablo rind bêro ercnayene.”